लखनऊ: अयोध्येतील श्रीराम जन्मभूमी तीर्थ क्षेत्र ट्रस्टच्या मुख्य कार्यकारी अधिकारीपदाबाबत निर्णय घेण्यात आला आहे. एअर मार्शल जितेंद्र मिश्रा यांची ट्रस्टच्या सीईओपदी निवड करण्यात आली आहे.
बुधवारी अयोध्येतील मणिरामदास छावणीत महंत नृत्यगोपालदास यांच्या अध्यक्षतेखाली झालेल्या ट्रस्टच्या बैठकीत सर्वसंमतीने हा निर्णय घेण्यात आला. या बैठकीला ट्रस्टचे प्रमुख पदाधिकारी तसेच निमंत्रित सदस्य उपस्थित होते.
याच बैठकीत ट्रस्टमध्ये तीन नव्या सदस्यांचीही घोषणा करण्यात आली. नव्याने समाविष्ट करण्यात आलेल्या सदस्यांमध्ये अयोध्येतील मदन मोहन पांडे, दिल्लीतील महेश भागचंदका आणि अयोध्येतील निर्मला यादव यांचा समावेश आहे.
ट्रस्टने एअर मार्शल जितेंद्र मिश्रा यांची राम मंदिराचे पहिले मुख्य कार्यकारी अधिकारी (सीईओ) म्हणून नियुक्ती केली आहे. भारतीय वायुसेनेत सुमारे चार दशके महत्त्वाच्या जबाबदाऱ्या सांभाळलेल्या मिश्रा यांच्यावर आता राम मंदिराच्या प्रशासकीय आणि कार्यकारी व्यवस्थेला नवी दिशा देण्याची जबाबदारी असेल.
एअर मार्शल जितेंद्र मिश्रा हे मूळचे देवरिया जिल्ह्यातील भाटपारराणी परिसरातील भोपतपुरा गावचे रहिवासी आहेत. त्यांनी 6 डिसेंबर 1986 रोजी भारतीय वायुसेनेत फायटर पायलट म्हणून कमिशन मिळवले. आपल्या प्रदीर्घ लष्करी कारकिर्दीत त्यांनी 18 हून अधिक प्रकारच्या विमानांमधून उड्डाण केले असून, त्यांना 3,000 तासांहून अधिक उड्डाणाचा अनुभव आहे. त्यांनी कमांडिंग-इन-चीफ पदाची जबाबदारीही सांभाळली आहे.
याशिवाय, एकात्मिक संरक्षण कर्मचारी व्यवस्थेत उपप्रमुख (धोरण, संघटन आणि प्रशिक्षण) यांसारखी महत्त्वाची जबाबदारीही त्यांनी पार पाडली आहे. भारतासोबतच अमेरिका आणि ब्रिटनमधील प्रतिष्ठित संरक्षण संस्थांमध्ये प्रशिक्षण घेतलेल्या मिश्रा यांच्याकडे मोठ्या संघटनेचे संचालन आणि नेतृत्व करण्याचा व्यापक अनुभव आहे.
राम मंदिराच्या सीईओपदी त्यांची नियुक्ती महत्त्वाची मानली जात आहे. कारण मंदिर आता बांधकामाच्या टप्प्यापुढे जाऊन व्यवस्थित संचालन आणि जागतिक धार्मिक पर्यटन केंद्र म्हणून विकसित होत आहे. दररोज मोठ्या संख्येने भाविकांची ये-जा, सुरक्षा व्यवस्था, दर्शनाचे नियोजन, कर्मचारी व्यवस्थापन, सुविधांचा विस्तार तसेच विविध यंत्रणांमध्ये समन्वय साधणे, अशा अनेक महत्त्वाच्या जबाबदाऱ्या सीईओसमोर असतील.
अशा परिस्थितीत लष्करी सेवेतून आलेल्या मिश्रा यांचे शिस्तबद्ध कार्यपद्धती, नेतृत्वगुण, मोठ्या संस्थेचे व्यवस्थापन आणि विविध यंत्रणांमध्ये समन्वय साधण्याचा अनुभव ट्रस्टसाठी महत्त्वाचा ठरणार आहे. देवरियातील एका छोट्याशा भोपतपुरा गावातून भारतीय वायुसेनेच्या सर्वोच्च नेतृत्वापर्यंत पोहोचलेल्या मिश्रा यांच्यासाठी आता अयोध्येतील राम मंदिराचे पहिले सीईओ म्हणून एका नव्या अध्यायाची सुरुवात झाली आहे.
