मुंबई: नव्वदच्या दशकात रात्रीच्या अंधारात रस्त्यावर झोपलेल्या निष्पापांची निर्घृण हत्या करणाऱ्या रमन राघवच्या दहशतीची आठवण करून देणारा एक थरारक आणि विकृत प्रकार मुंबईत समोर आला आहे. माणसांऐवजी मुक्या जीवांना लक्ष्य करणारा एक माथेफिरू ‘कॅट किलर’ सध्या गोवंडीच्या पांजरापोळ परिसरात उजळ माथ्याने फिरत असून, त्याच्या क्रूर कृत्यांमुळे संपूर्ण परिसरात गूढ भीतीचे सावट पसरले आहे. मागील महिन्यात ५ आणि चालू महिन्यात तब्बल १५ अशा एकूण २० मांजरी संशयास्पदरीत्या गायब झाल्या असतानाच, आतापर्यंत ६ मांजरांचे अतिशय भयानक, विद्रूप आणि रक्ताळलेले मृतदेह हाती लागल्याने एकच खळबळ उडाली आहे. कुणाचे डोके जड वस्तूने फोडून चेंदामेंदा केलेले तर कुणाचे थेट धारदार शस्त्राने पोट फाडलेले, अशा अंगावर काटा आणणाऱ्या अवस्थेत मृतदेह सापडत असल्याने या विकृत शिकारीचा छडा लावण्यासाठी आंतरराष्ट्रीय प्राणीमित्र संघटना ‘पेटा’नेही थेट ५० हजार रुपयांचे रोख बक्षीस जाहीर केले आहे.
या अनाकलनीय आणि भयानक मालिकेची सुरुवात ३ सप्टेंबर २०२६ रोजी झाली. पांजरापोळ भागात एकाच दिवशी चार मांजरी संशयास्पद मृतावस्थेत आढळल्या होत्या; सुरुवातीला याकडे दुर्लक्ष झाले, मात्र ५ सप्टेंबर रोजी पुन्हा आणखी दोन मांजरांचे मृतदेह अतिशय विकृत अवस्थेत सापडल्याने हा अपघाती मृत्यू नसून थंड डोक्याने केलेला क्रूर कट असल्याचे उघडकीस आले. भाड्याच्या खोलीत राहून बेवारस मांजरांना आसरा देणाऱ्या आणि दिवसातून दोन वेळा त्यांना मोफत अन्न पुरवणाऱ्या स्थानिक प्राणीप्रेमी रुबिना पठाण यांच्या तक्रारीवरून आरसीएफ पोलिसांनी तात्काळ एफआयआर नोंदवून अज्ञात विकृताचा शोध सुरू केला आहे. आपल्या देखरेखीखालील मांजरांना जाणीवपूर्वक आणि सूडबुद्धीने संपवण्यात आल्याचा थेट आरोप पठाण यांनी केला असून, यापूर्वी अनेकदा धमक्या देणाऱ्या ‘शिवा’ नावाच्या संशयित इसमावर त्यांनी उघड संशय व्यक्त केला आहे.
पोलिसांनी घटनास्थळासह परिसरातील सर्व सीसीटीव्ही कॅमेऱ्यांचे फुटेज तपासण्यास सुरुवात केली असून, बीएनएस कलम ३२५ तसेच प्राणी क्रूरता प्रतिबंधक कायद्यांतर्गत गुन्हा दाखल करून तपास चक्रे वेगाने फिरवली आहेत. रात्रीच्या अंधारात शांततेचा गैरफायदा घेऊन मांजरांची पोटं फाडणारा आणि डोकी फोडणारा हा गूढ मारेकरी नेमका कोण, तो या निरपराध प्राण्यांचा असा अमानुष बळी का घेत आहे, की यामागे आणखी काही विकृत मानसिकता दडली आहे, या प्रश्नांचे गूढ अद्याप कायम आहे. जो कोणी या अज्ञात कॅट किलरला बेड्या ठोकण्यास आणि त्याला कायदेशीर शिक्षेपर्यंत पोहोचवण्यास मदत करणारी माहिती देईल, त्याला पेटा इंडियाकडून ५० हजार रुपयांचे बक्षीस दिले जाणार असून, आता पोलीस या मारेकऱ्याच्या मुसक्या कधी आवळतात याकडे संपूर्ण मुंबईचे लक्ष लागले आहे.
