आंबोली: कोकणातील निसर्गरम्य वातावरणात वर्षा पर्यटनाचा आनंद घेण्यासाठी गेलेल्या एका पर्यटकाचा पाण्याचा अंदाज न आल्यामुळे चिरेखाणीत बुडून अत्यंत दुर्दैवी मृत्यू झाल्याची हृदयद्रावक घटना घडली आहे. संजय लक्ष्मण गावकर (वय ५०, रा. इन्सुली, ता. सावंतवाडी) असे मृत पावलेल्या दुर्दैवी पर्यटकाचे नाव असून, गेल्या अवघ्या सहा दिवसांत वेगवेगळ्या तीन दुर्घटनांमध्ये तीन पर्यटकांचा बळी गेल्यामुळे सर्वत्र हळहळ व्यक्त होत आहे.
सावंतवाडी येथील माजगाव उद्यमनगर परिसरातील एका खासगी कंपनीत काम करणारे कर्मचारी सहकाऱ्यांसोबत आंबोली येथे पर्यटनासाठी आले होते. दुपारी साडेतीन वाजण्याच्या सुमारास आंबोली परिसरातील सतिचीवाडी येथील पाण्याने भरलेल्या एका धोकादायक चिरेखाणीजवळ या ग्रुपने पार्टी केली आणि यादरम्यान काहीजण पोहण्यासाठी व अंघोळ करण्यासाठी पाण्यात उतरले. संजय गावकर यांनीदेखील आनंदाच्या भरात पाण्यात उडी मारली, मात्र त्यांना पोହता येत नसल्याने आणि पाण्याचा खोलीचा नेमका अंदाज न आल्याने ते पाण्यात बुडू लागले.
त्यांच्या समवेत असलेल्या सहकाऱ्यांनी त्यांना वाचवण्याचा टाहो फोडत शर्थीचे प्रयत्न केले, परंतु तोपर्यंत उशीर झाला होता. या घटनेची माहिती मिळताच माजी सरपंच शशिकांत गावडे यांनी तातडीने आंबोली पोलीस दूरक्षेत्र आणि स्थानिक आपत्कालीन पथकाला संपर्क साधला. घटनेचे गांभीर्य ओळखून सह्याद्री एडवेंचर आंबोली आणि सांगेली रेस्क्यू टीमचे सदस्य तातडीने घटनास्थळी दाखल झाले आणि रेस्क्यू टीमच्या अजित नार्वेकर यांनी प्रसंगावधान राखत अत्यंत धोकादायक स्थितीत खोल पाण्यात उतरून संजय गावकर यांचा मृतदेह बाहेर काढला. एका हसतखेळत आलेल्या पर्यटकाचा असा अचानक अनपेक्षित अंत झाल्यामुळे इन्सुली आणि सावंतवाडी परिसरात शोककळा पसरली असून, पर्यटकांनी पर्यटनादरम्यान पाण्याचा अंदाज न घेता अशा धोकादायक ठिकाणी जाणे किती जिवावर बेतू शकते, याची प्रचिती या घटनेने पुन्हा एकदा दिली आहे.
