गणपती उत्सवासाठी नांदेड-कोकण विशेष रेल्वेची मागणी

लातूर: गणपती उत्सवाच्या पार्श्वभूमीवर मराठवाड्यातून कोकणात जाणाऱ्या प्रवाशांची वाढती गर्दी लक्षात घेता नांदेड-लातूर-धाराशिवमार्गे कोकणासाठी विशेष गणपती रेल्वे सुरू करावी, अशी मागणी लातूर लोकसभा मतदारसंघाचे खासदार डॉ. शिवाजी बंडप्पा काळगे यांनी केली आहे.

यासंदर्भात खासदार काळगे यांनी 1 सप्टेंबर 2026 रोजी दक्षिण मध्य रेल्वेच्या महाव्यवस्थापकांना पत्र पाठवून गणपती उत्सवाच्या काळात मराठवाड्यातील प्रवाशांसाठी विशेष रेल्वे सेवा उपलब्ध करून देण्याची मागणी केली आहे.

प्रस्तावित विशेष रेल्वे नांदेड-लातूर-धाराशिवमार्गे चिपळूण, रत्नागिरी किंवा सावंतवाडी रोड या कोकणातील स्थानकांपर्यंत चालविण्याची मागणी करण्यात आली आहे. पत्रानुसार, 10, 11, 12, 13, 18, 19 आणि 20 सप्टेंबर 2026 रोजी विशेष रेल्वे सेवा चालविण्याचा प्रस्ताव असून, योग्य तारखांना परतीच्या सेवाही उपलब्ध करून द्याव्यात, अशी विनंती करण्यात आली आहे.

मराठवाड्यातील अनेक प्रवाशांना कोकणातील आपल्या गावी जाण्यासाठी सध्या थेट रेल्वे सेवा उपलब्ध नसल्याने रेल्वे बदलावी लागते. गणपती उत्सवाच्या काळात प्रवाशांची संख्या मोठ्या प्रमाणात वाढत असल्याने या अडचणी आणखी तीव्र होण्याची शक्यता आहे.

प्रस्तावित विशेष रेल्वेमुळे नांदेड, लातूर, धाराशिवसह मराठवाड्यातील प्रवाशांना कोकणात जाण्यासाठी थेट आणि सोयीची रेल्वे जोडणी उपलब्ध होऊ शकते. त्यामुळे गणपती उत्सवासाठी कोकणात जाणाऱ्या हजारो प्रवाशांना मोठा दिलासा मिळण्याची शक्यता आहे.

रेल्वे प्रशासनाने या मागणीचा प्राधान्याने विचार करून मध्य रेल्वे, कोकण रेल्वे आणि संबंधित अधिकाऱ्यांशी समन्वय साधावा. उपलब्ध रेल्वे मार्ग, वेळापत्रक, भाडे तसेच अन्य आवश्यक बाबींचा विचार करून विशेष रेल्वे सेवा लवकरात लवकर निश्चित करावी, अशी मागणी खासदार काळगे यांनी पत्राद्वारे केली आहे.

दरम्यान, गणपती उत्सवासाठी कोकणात जाणाऱ्या मराठवाड्यातील प्रवाशांच्या दृष्टीने ही मागणी महत्त्वाची ठरली असून, रेल्वे प्रशासनाच्या निर्णयाकडे प्रवाशांचे लक्ष लागले आहे.