खेड (प्रतिनिधी) : लायन्स क्लब ऑफ खेड सिटीच्या वतीने सन २०२५-२६ या शैक्षणिक वर्षात दहावी व बारावीच्या विद्यार्थ्यांच्या उज्ज्वल भविष्यासाठी घेतलेल्या विशेष परिश्रमांबद्दल तसेच प्रशालेने मिळवलेल्या उत्कृष्ट निकालाबद्दल एम. आय. हजवानी इंग्लिश मीडियम स्कूलचा गौरव करण्यात आला. हा सन्मान सोहळा बुधवार दिनांक २१ मे २०२६ रोजी उत्साहात पार पडला.
यावेळी एम. आय. हजवानी इंग्लिश मीडियम स्कूलचे चेअरमन श्री. बशीरभाई हजवानी तसेच मुख्याध्यापिका श्रीमती सलवा तिसेकर मॅडम यांचा लायन्स क्लब ऑफ खेड सिटीच्या वतीने सत्कार करून अभिनंदन करण्यात आले. विद्यार्थ्यांच्या गुणवत्तापूर्ण शिक्षणासाठी शाळेकडून सातत्याने केले जाणारे प्रयत्न, शिक्षकांचे मार्गदर्शन आणि विद्यार्थ्यांच्या यशामागील मेहनतीची दखल घेत हा सन्मान प्रदान करण्यात आला.
कार्यक्रमावेळी लायन्स क्लब ऑफ खेड सिटीचे अध्यक्ष महेंद्र शिरगावकर, माजी अध्यक्ष रोहन विचारे, लायन अविनाश दळवी, लायन उत्तम कांबळे सर, लायन संदीप मोरे, लायन विनोद मोरे, राठोड सर तसेच अन्य मान्यवर उपस्थित होते. उपस्थितांनी शाळेच्या शैक्षणिक प्रगतीचे कौतुक करत पुढील वाटचालीस शुभेच्छा दिल्या.
