कोळकेवाडी कॅनॉलमध्ये शोधमोहीम सुरू
चिपळूण: येथील एचडीएफसी बँकेच्या शाखेत डेप्युटी मॅनेजर पदावर कार्यरत असलेले ३३ वर्षीय तरुण मुकुंद मुरलीधर पालांडे काल दुपारी तीन वाजल्यापासून अचानक बेपत्ता झाले असून, या घटनेने चिपळूण परिसरात मोठी खळबळ उडाली आहे. अलोरे गावचे रहिवासी असलेले मुकुंद पालांडे बेपत्ता झाल्याची रीतसर नोंद शिरगाव पोलीस ठाण्यात करण्यात आली आहे. अत्यंत धक्कादायक बाब म्हणजे, बेपत्ता होण्यापूर्वी त्यांनी स्वतःच्या हाताने चिपळूण पोलीस निरीक्षकांच्या नावे एक चार पानांचे पत्र लिहिले असून, त्यात आपल्या आत्महत्येला एचडीएफसी बँकेच्या चिपळूण शाखेतील चार जण जबाबदार असल्याचा थेट आरोप केला आहे. बँकेतील या चौघांकडून होत असलेला प्रचंड मानसिक त्रास आणि ब्लॅकमेलिंग यामुळेच आपण हे टोकाचे पाऊल उचलत असल्याचे त्यांनी या पत्रात स्पष्टपणे नमूद केले आहे.
या पत्रात मुकुंद पालांडे यांनी आणखी एका घटनेचा उल्लेख केला असून, दोन दिवसांपूर्वी चिपळूण येथील विरेश्वर तलाव परिसरात त्यांना काही तरुणांनी मारहाण केली होती. त्यावेळी एका ओळखीच्या पोलिसाने मध्यस्थी करून ते प्रकरण मिटवले होते, असे त्यांनी लिहिले आहे. दरम्यान, काल रात्री साडेआठ वाजण्याच्या सुमारास शिरगाव पोलीस ठाण्याचे पोलीस निरीक्षक भरत पाटील व त्यांच्या पथकाला कोळकेवाडी येथील कॅनॉल नजीक मुकुंद यांची दुचाकी सापडली. त्यामुळे त्यांनी या कॅनॉलमध्ये उडी घेतली असण्याची दाट शक्यता वर्तवली जात आहे. पोलिसांनी काल रात्रीच या भागात शोध घेतला होता, मात्र आज सकाळी तपास चक्रांना गती देत चिपळूणहून खास बोट मागवण्यात आली असून कॅनॉलच्या पाण्यात मोठी शोधमोहीम सुरू करण्यात आली आहे. या घटनेमुळे पालांडे यांचे कुटुंबीय अत्यंत दबावाखाली असून संपूर्ण कुटुंब प्रचंड चिंतेत आहे; तर पोलीस या चार पानी पत्राच्या आधारे बँकेतील त्या संशयितांचा आणि एकूण प्रकरणाचा सखोल तपास करत आहेत.
