सावर्डे : सह्याद्री शिक्षण संस्था संचलित गोविंदराव निकम माध्यमिक व उच्च माध्यमिक विद्यालय, सावर्डे येथील विद्यार्थी साई जाधव याने बुद्धीबळ खेळात आपल्या कौशल्याची चुणूक दाखवून दिली आहे. चिपळूण येथे ‘द माईंड गेम चेस अकॅडमी’ द्वारे आयोजित करण्यात आलेल्या ‘चिपळूण तालुका रॅपिड चेस टूर्नामेंट’ मध्ये साई जाधव याने अत्यंत चुरशीच्या लढतीत तृतीय क्रमांक पटकावून विद्यालयाच्या शिरपेचात मानाचा तुरा रोवला आहे.
विद्यार्थ्यांमधील सुप्त गुणांना वाव मिळावा आणि त्यांना बुद्धिबळ खेळासाठी हक्काचे व्यासपीठ उपलब्ध व्हावे, या उद्देशाने माईंड गेम चेस अकॅडमीतर्फे दरवर्षी या स्पर्धांचे आयोजन केले जाते. यावर्षी चिपळूण येथे पार पडलेल्या या स्पर्धेत तालुक्यातून तब्बल १८६ स्पर्धकांनी उत्स्फूर्त सहभाग नोंदवला होता. प्रचंड स्पर्धा असतानाही सावर्डे विद्यालयाच्या साई जाधव याने आपल्या एकाग्रतेच्या आणि नियोजनाच्या जोरावर प्रतिस्पर्ध्यांवर मात करत हे यश संपादन केले. सावर्डे विद्यालयातून या स्पर्धेसाठी एकूण चार खेळाडू सहभागी झाले होते, त्यामध्ये साई जाधव याने प्रभावी कामगिरी केली.
साईच्या या यशामागे त्याला लाभलेले योग्य मार्गदर्शन आणि सराव कारणीभूत ठरला आहे. त्याला विद्यालयातील क्रीडा शिक्षक दादासाहेब पांढरे, रोहित गमरे, अमृत कडगावे आणि प्रशांत सकपाळ यांचे बहुमूल्य मार्गदर्शन लाभले. त्यांच्या मार्गदर्शनाखाली साईने आपल्या खेळातील बारकावे सुधारले, ज्याचा फायदा त्याला या स्पर्धेत झाला.
साई जाधव याने मिळवलेल्या या गौरवशाली यशाबद्दल विद्यालयाचे प्राचार्य राजेंद्र वारे आणि उपप्राचार्य विजय चव्हाण यांनी विशेष आनंद व्यक्त केला आहे. तसेच भविष्यातील वाटचालीस त्याला शुभेच्छा दिल्या आहेत. या यशामुळे सावर्डे विद्यालयात आनंदाचे वातावरण असून विद्यार्थी, शिक्षक आणि पालकांकडून साई जाधव याच्यावर अभिनंदनाचा वर्षाव होत आहे.
