रत्नागिरी: देशभरातील नागरिकांना फिटनेस आणि आरोग्यासाठी प्रेरित करण्याच्या उद्देशाने भारत सरकारच्या ‘फिट इंडिया मूव्हमेंट’ अंतर्गत आयोजित करण्यात आलेल्या एका भव्य आणि ऐतिहासिक ‘काश्मीर ते कन्याकुमारी (K2K) सायकल यात्रा’ मोहिमेने मोठी लक्षवेधी कामगिरी नोंदवली आहे. लोहपुरुष सरदार वल्लभभाई पटेल यांच्या १५० व्या जयंतीनिमित्त ‘Dare2Gear’ या संस्थेच्या संयुक्त विद्यमाने आयोजित करण्यात आलेली ही मोहीम श्रीनगर, काश्मीर ते कन्याकुमारी असा सुमारे ४२०० किलोमीटरचा खडतर प्रवास केवळ १६ दिवसांत यशस्वीरित्या पूर्ण करण्यात आली. यामध्ये महाराष्ट्राच्या रत्नागिरी जिल्ह्याचे सुपुत्र आणि खेड तालुक्यातील तळघर गावचे रहिवासी असलेले सायकलपटू श्री. सचिन बाळा पालकर यांनी ‘फिट इंडिया’ टीमचे अधिकृत सदस्य म्हणून अत्यंत उल्लेखनीय कामगिरी करत महाराष्ट्राच्या शिरपेचात मानाचा तुरा रोवला आहे.
देशभरातील १५० निवडक आणि अनुभवी सायकलपटूंनी यात सहभाग घेतला होता, त्यापैकी एक सदस्य म्हणून सचिन पालकर यांची भारत सरकारच्या ‘फिट इंडिया’ टीममार्फत अधिकृत निवड करण्यात आली होती. ही ऐतिहासिक मोहीम १ नोव्हेंबर २०२५ रोजी श्रीनगर, काश्मीर येथून सुरू झाली आणि अवघ्या १६ दिवसांत, म्हणजे १६ नोव्हेंबर २०२५ रोजी भारताच्या दक्षिण टोकावरील कन्याकुमारी येथे यशस्वीरित्या संपन्न झाली. या प्रवासादरम्यान सायकलपटूंनी जम्मू, दोराह, दिल्ली, आणि जयपूर मार्गे प्रवास केला. या प्रवासाचे एक विशेष आकर्षण म्हणजे ही सायकल यात्रा सरदार वल्लभभाई पटेल यांच्या गुजरात येथील नर्मदा तीरावरील भव्य ‘स्टॅच्यू ऑफ युनिटी’ (Statue of Unity) येथे पोहोचली. तेथे अभिवादन करून सायकलपटू पुढे महाराष्ट्रात धुळे, बीड, सोलापूर अशा जिल्ह्यांतून पुढे कर्नाटक व तामिळनाडू राज्य ओलांडत आपल्या अंतिम ध्येयापर्यंत पोहोचले.
सचिन पालकर यांनी यशस्वीपणे पूर्ण केलेला हा सायकल प्रवास केवळ लांब अंतराचा विक्रम नव्हता, तर तो त्यांच्या जिद्द, धैर्य आणि शारीरिक क्षमतेचा एक मोठा कसोटीचा क्षण होता. १६ दिवसांच्या या मोहिमेत सायकलपटूंनी उत्तरेकडील थंडीपासून दक्षिणेकडील उष्णता, विविध राज्यांचे अत्यंत प्रतिकूल हवामान, कठीण आणि उंचसखल भौगोलिक परिस्थिती अशा अनेक आव्हानांचा सामना केला. या सर्व अडथळ्यांवर मात करत सायकलपटूंनी दररोज सरासरी २२५ ते २६० किलोमीटर अंतर कापले. या १६ दिवसांच्या कालावधीत सचिन पालकरांनी एकूण ४१०० किलोमीटर अंतर आणि जवळपास २०,००० मीटर (Elevation) उंचीचा टप्पा मोठ्या आत्मविश्वासाने आणि सहजतेने पार केला. या अतुलनीय आणि धाडसी कामगिरीबद्दल प्रवास पूर्ण केल्यानंतर सचिन पालकर यांचे सर्व स्तरांतून कौतुक होत आहे. त्यांनी या मोहिमेत सहभागी होण्याची संधी दिल्याबद्दल आयोजक आणि ‘फिट इंडिया’ टीमचे विशेष आभार मानले असून, आपल्या यशाचे श्रेय आई-वडील, गुरुजन आणि मित्रमंडळी यांना दिले आहे.
