नाचणे गणेश कॉलनीत विजेच्या मुख्य वाहिनीवर झाड कोसळले; महावितरणच्या तत्परतेने वीजपुरवठा काही तासातच सुरळीत

रत्नागिरी/ अजय सावंत : शहरानजीकच्या नाचणे ग्रामपंचायत हद्दीतील गणेश कॉलनी येथे सोमवारी रात्री सुमारे 8.45 वाजण्याच्या सुमारास विजेच्या मुख्य वाहिनीवर मोठे झाड कोसळल्याने परिसरातील वीजपुरवठा खंडित झाला. झाड विद्युत वाहिनीवर पडताच मोठा आवाज झाल्याने नागरिकांमध्ये काही काळ भीती आणि घबराटीचे वातावरण निर्माण झाले.

सोमवारी दिवसभर रत्नागिरी शहरासह तालुक्यात मुसळधार पाऊस सुरू होता. हवामान विभागाकडून जिल्ह्यात अतिवृष्टीची शक्यता वर्तवणारे सतर्कतेचे संदेश नागरिकांना वारंवार मिळत होते. सायंकाळी सोसाट्याच्या वाऱ्यासह झालेल्या जोरदार पावसामुळे झाडाची मुळे सैल होऊन हे झाड कोसळले असावे, असा अंदाज स्थानिक नागरिकांनी व्यक्त केला.

घटनेची माहिती मिळताच महावितरणचे कर्मचारी तातडीने घटनास्थळी दाखल झाले. विद्युत वाहिनीवरील झाड हटवून वीजपुरवठा पूर्ववत करण्यासाठी त्यांनी युद्धपातळीवर काम सुरू केले. झाड रस्त्याच्या मध्यभागी पडल्याने काही काळ वाहतुकीवरही परिणाम झाला.

दरम्यान, या घटनेची माहिती मिळताच ग्रामपंचायत सदस्य संकेत कदम तसेच ग्रामपंचायतीचे कर्मचारी घटनास्थळी पोहोचले आणि मदतकार्य व वाहतूक सुरळीत करण्यासाठी सहकार्य केले.

महावितरणच्या कर्मचाऱ्यांच्या अथक प्रयत्नांनंतर रात्री सुमारे 10 वाजता वीजपुरवठा पुन्हा सुरळीत करण्यात यश आले. प्रतिकूल हवामानातही तातडीने प्रतिसाद देत वीजपुरवठा पूर्ववत केल्याबद्दल महावितरणच्या कर्मचाऱ्यांचे परिसरातील नागरिकांकडून कौतुक होत आहे.