रत्नागिरी परिमंडलातील ग्राहकांना नऊ महिन्यात 1 कोटी 43 लाख 77 हजारांची सवलत
मीटरचे स्वयंचलित रीडिंग; विजेचा वापरही मोबाईलवर उपलब्ध
रत्नागिरी: महावितरणकडून राज्यातील घरगुती वीजग्राहकांना स्मार्ट टीओडी (Time of Day) मीटरच्या माध्यमातून नवे तंत्रज्ञान उपलब्ध होत आहे. महाराष्ट्र विद्युत नियामक आयोगाने निश्चित केलेल्या वीजदरामध्ये घरगुती ग्राहकांना दिवसाच्या वीज वापरामध्ये प्रतियुनिट 80 पैसे ते 1 रुपया सवलत जाहीर केली आहे. त्यानुसार घरगुती ग्राहकांना टीओडीप्रमाणे वीज दरात सवलत मिळण्याचा प्रत्यक्ष फायदा दि. 1 जुलै 2025 पासून सुरु झाला आहे. या अंतर्गत रत्नागिरी व सिंधुदुर्ग जिल्ह्यातील 1 लाख 76 हजार 617 वीज ग्राहकांना नऊ महिन्यामध्ये एकूण 1 कोटी 43 लाख 77 हजार इतक्या रुपयांची सवलत मिळाली आहे. महावितरणकडून हे स्मार्ट टीओडी मीटर ग्राहकांकडे मोफत लावण्यात येत आहेत.
स्मार्ट टीओडी मीटरमुळे जुलै महिन्यात रत्नागिरी जिल्ह्यातील 48 हजार 481 ग्राहकांना 3 लाख 20 हजारांची तर सिंधुदुर्ग जिल्ह्यातील 12 हजार 125 ग्राहकांना 68 हजार रुपयांची सवलत मिळाली आहे. ऑगस्ट महिन्यात रत्नागिरी जिल्ह्यातील 91 हजार 360 ग्राहकांना 11 लाख 81 हजारांची तर सिंधुदुर्ग जिल्ह्यातील 31 हजार 772 ग्राहकांना 03 लाख 98 हजार रुपयांची सवलत मिळाली आहे. सप्टेंबर महिन्यात रत्नागिरी जिल्ह्यातील 1 लाख 10 हजार 135 ग्राहकांना 15 लाख 46 हजारांची तर सिंधुदुर्ग जिल्ह्यातील 36 हजार 938 ग्राहकांना 5 लाख 48 हजार रुपयांची सवलत मिळाली आहे. ऑक्टोबर महिन्यात रत्नागिरी जिल्ह्यातील 1 लाख 1 हजार 531 ग्राहकांना 12 लाख 30 हजारांची तर सिंधुदुर्ग जिल्ह्यातील 36 हजार 7 ग्राहकांना 4 लाख 42 हजार रुपयांची सवलत मिळाली आहे. नोव्हेंबर महिन्यात रत्नागिरी जिल्ह्यातील 1 लाख 4 हजार 122 ग्राहकांना 13 लाख 28 हजारांची तर सिंधुदुर्ग जिल्ह्यातील 37 हजार 790 ग्राहकांना 4 लाख 92 हजार रुपयांची सवलत मिळाली आहे. डिसेंबर महिन्यात रत्नागिरी जिल्ह्यातील 1 लाख 5 हजार 775 ग्राहकांना 11 लाख 36 हजारांची तर सिंधुदुर्ग जिल्ह्यातील 39 हजार 629 ग्राहकांना 4 लाख 60 हजार रुपयांची सवलत मिळाली आहे.
जानेवारी महिन्यात रत्नागिरी जिल्ह्यातील 1 लाख 4 हजार 351 ग्राहकांना 9 लाख 78 हजारांची तर सिंधुदुर्ग जिल्ह्यातील 41 हजार 315 ग्राहकांना 4 लाख 23 हजार रुपयांची सवलत मिळाली आहे. फेब्रुवारी महिन्यात रत्नागिरी जिल्ह्यातील 1 लाख 13 हजार 305 ग्राहकांना 12 लाख 63 हजारांची तर सिंधुदुर्ग जिल्ह्यातील 44 हजार 626 ग्राहकांना 5 लाख 33 हजार रुपयांची सवलत मिळाली आहे. मार्च महिन्यात रत्नागिरी जिल्ह्यातील 1 लाख 29 हजार 518 ग्राहकांना 14 लाख 93 हजारांची तर सिंधुदुर्ग जिल्ह्यातील 47 हजार 99 ग्राहकांना 5 लाख 39 हजार रुपयांची सवलत मिळाली आहे.
नऊ महिन्यांचा एकत्रित विचार करता रत्नागिरी जिल्ह्यातील 1 लाख 29 हजार 518 ग्राहकांना 1 कोटी 4 लाख 75 हजारांची तर सिंधुदुर्ग जिल्ह्यातील 47 हजार 99 ग्राहकांना 39 लाख 2 हजार रुपयांची सवलत मिळाली आहे.
नव्या तंत्रज्ञानाच्या मीटरमधून स्वयंचलित मासिक रीडिंग होत असल्याने अचूक बिले मिळतात आणि घरातील विजेचा वापर दर अर्धा तासाला संबंधित ग्राहकांना मोबाईलवर पाहता येते. त्यामुळे वीज वापरावर देखील ग्राहकांचे थेट नियंत्रण राहत आहे. तर सकाळी 9 ते 5 वाजेपर्यंत वीजग्राहक घरातील प्रामुख्याने वॉशिंग मशीन, गिझर, इस्त्री, एअर कंडिशनर व जास्त वीज वापर असणाऱ्या इतर उपकरणांचा वापर करू शकतात. त्यात टीओडी मीटरमुळे ग्राहकांचा मोठा आर्थिक फायदा होत आहे.
टाईम ऑफ डे प्रणालीनुसार वीज वापराच्या कालावधीनुसार दर आकारणी केली जाते. औद्योगिक ग्राहकानंतर घरगुती ग्राहकांना प्रथमच स्वस्त वीज दरासाठी टीओडी प्रमाणे आकारणी सुरू झाली आहे. सन 2025 ते 2030 या पाच वर्षांसाठी आयोगाने घरगुती ग्राहकांसाठी टाईम ऑफ डे (टीओडी) नुसार सकाळी 9 ते सायंकाळी 5 या वेळेत वापरलेल्या विजेसाठी प्रतियुनिट 80 पैसे ते 1 रुपया सवलत मंजूर केली आहे. यात दि. 1 जुलै 2025 ते मार्च 2026 मध्ये 80 पैसे, सन 2027 मध्ये 85, सन 2028 व 29 मध्ये 90 पैसे तसेच सन 2030 मध्ये 1 रुपये प्रतियुनिट सवलत मिळणार आहे. या सवलतीचा लाभ घेण्यासाठी स्मार्ट टीओडी मीटर घरगुती ग्राहकांकडे बसविणे आवश्यक आहे.
स्मार्ट टीओडी मीटरचे मासिक रीडिंग स्वयंचलित होत आहे. कोणताही मानवी हस्तक्षेप नसल्याने बिलिंगच्या तक्रारी जवळपास संपुष्टात येत आहेत. तसेच घरात किती वीज वापरली याची सर्व माहिती सर्व संबंधित ग्राहकाच्या मोबाईल ॲपवर उपलब्ध होत आहे. त्यामुळे ग्राहकांस योग्य वीज वापराचे नियोजन करता येतेय. यासह ज्यांच्याकडे छतावरील सौर ऊर्जा प्रकल्प आहे त्यातून वापरलेल्या व शिल्लक राहिलेल्या विजेचा लेखाजोखा ठेवणे हे या स्मार्ट टीओडी मीटरचे प्रमुख फायदे आहे. या नव्या मीटरचा कोणताही आर्थिक भुर्दंड ग्राहकांवर नाही. स्मार्ट टीओडी मीटर हे प्रीपेड नाही तर पोस्टपेड आहे. म्हणजे आधी वीज वापरा मग मासिक बिल भरा असे महावितरणकडून स्पष्ट करण्यात आले आहे.
