दापोली : तालुक्यातील कुडावळे आदिवासीवाडी येथील एका ३४ वर्षीय तरुणाचा शेतात काम करत असताना सर्पदंश झाल्याने उपचारादरम्यान मृत्यू झाल्याची दुर्दैवी घटना घडली आहे. दीपक लक्ष्मण पवार (वय ३४, रा. कुडावळे आदिवासीवाडी, ता. दापोली, जि. रत्नागिरी) असे मृत तरुणाचे नाव आहे.
मिळालेल्या माहितीनुसार, दीपक पवार हे १० जुलै २०२५ रोजी शेतात काम करण्यासाठी गेले होते. त्याचवेळी त्यांना सर्पदंश झाला. सर्पदंश झाल्यानंतर त्यांना तातडीने दापोली येथील प्राथमिक आरोग्य केंद्रात उपचारासाठी आणण्यात आले. मात्र, त्यांची तब्येत अधिक खालावल्याने त्यांना चिपळूण तालुक्यातील डेरवण येथील वालावलकर रुग्णालयात पुढील उपचारांसाठी दाखल करण्यात आले.
वालावलकर रुग्णालयात त्यांच्यावर उपचार सुरू असताना, ११ जुलै २०२५ रोजी सकाळी ८.४६ वाजता त्यांचे निधन झाले. या घटनेची नोंद सावर्डे पोलिस ठाण्यात करण्यात आली होती. त्यानुसार आकस्मिक मृत्यूची नोंद करण्यात आली आहे.
