खेड: वेरळ येथील श्री समर्थ कृपा विश्व संकुलात पुन्हा एकदा घरफोडीची घटना घडली असून, यावेळी एका बंगल्यातील कपाट फोडून चोरट्यांनी 10 हजार रुपये रोख रक्कम लंपास केली. विशेष म्हणजे, याच संकुलातील गणेश मंदिरातील दानपेटीही फोडून त्यातील रक्कम चोरट्यांनी लुबाडली. शुक्रवारी सकाळी ही घटना उघडकीस आली असून, स्थानिक पोलीस घटनास्थळी दाखल होऊन पाहणी करण्यात आली.
या प्रकरणी अज्ञात चोरट्यांविरोधात गुन्हा दाखल करण्याची प्रक्रिया सायंकाळपर्यंत सुरू होती. रेल्वे स्थानकाच्या काही अंतरावर असलेल्या या संकुलात असंख्य सदनिका आणि बंगले आहेत. यापूर्वीही संकुलात चोरीच्या घटना घडल्या असून, त्यांचा तपास अद्याप अपूर्ण आहे. त्यामुळे पुन्हा एकदा संकुलातील घरांवर चोरट्यांनी डोळा ठेवत चोरी केल्याने रहिवाशांमध्ये भीतीचे वातावरण पसरले आहे.
चोरट्यांनी रात्रीच्या वेळी बंगल्यात प्रवेश करून कपाटातील रोख रक्कम आणि मंदिरातील दानपेटीतील रक्कम लंपास केली आहे. या घटनेमुळे पोलिसांसमोर पुन्हा एकदा तपासाचे मोठे आव्हान उभे ठाकले आहे. पोलीस निरीक्षक विवेक अहिरे यांच्या मार्गदर्शनाखाली सर्व शक्यतेचा तपास घेण्यात येत आहे.
विशेष म्हणजे, गेल्या आठवडाभरात परिसरात तीन घरफोड्या झाल्या असून, घरफोडींच्या सलग घटनांमुळे नागरिकांमध्ये अस्वस्थता आणि चिंता वाढली आहे. पोलिसांनी चोरट्यांचा लवकरात लवकर छडा लावावा आणि परिसरात गस्त वाढवावी, अशी मागणी आता स्थानिक ग्रामस्थांकडून होत आहे.
