लांजा : विद्यार्थ्यांच्या शैक्षणिक प्रगतीला चालना देण्यासाठी न्यू इंग्लिश स्कूल व तुकाराम पुंडलिक शेट्ये कनिष्ठ महाविद्यालय, लांजा येथील पालक-शिक्षक संघाने एक स्तुत्य उपक्रम राबवला आहे. राष्ट्रीय आर्थिक दुर्बल घटक विद्यार्थ्यांसाठी शिष्यवृत्ती योजना (NMMS) परीक्षेची तयारी करणाऱ्या विद्यार्थ्यांना मदत करण्यासाठी त्यांना आवश्यक असलेली मार्गदर्शक पुस्तके संघाच्या वतीने मोफत वाटण्यात आली.
ग्रामीण भागातील विद्यार्थ्यांना दर्जेदार शिक्षण मिळावे आणि त्यांना शिष्यवृत्ती परीक्षेत यश मिळवता यावे, यासाठी हा उपक्रम सुरू करण्यात आला आहे. योग्य मार्गदर्शन आणि अभ्यास सामग्री मिळाल्यामुळे या विद्यार्थ्यांना परीक्षेच्या तयारीसाठी मोठी मदत होणार आहे. भविष्यातही विद्यार्थ्यांच्या सर्वांगीण विकासासाठी असेच उपक्रम राबवण्याचा निर्धार पालक-शिक्षक संघाने व्यक्त केला.
यावेळी शाळेचे मुख्याध्यापक सुनील पाटोळे, पालक संघाच्या उपाध्यक्षा श्रुतिका कोलते, सचिव महादेव पवार, ज्येष्ठ शिक्षक राजेंद्र मारुलकर, तसेच इतर मार्गदर्शक शिक्षक उपस्थित होते. संस्थेच्या वतीने आणि प्रशालेच्या वतीने पालक-शिक्षक संघाच्या या योगदानाबद्दल त्यांचे आभार मानण्यात आले. या उपक्रमामुळे विद्यार्थ्यांमध्ये शिक्षणासाठी सकारात्मक वातावरण निर्माण होण्यास मदत होईल, अशी अपेक्षा व्यक्त करण्यात येत आहे.
