दिल्ली : दुबईतील जेबेल अली औद्योगिक परिसरात रात्री भीषण स्फोट झाल्याची माहिती समोर आली आहे. सोशल मीडियावर व्हायरल झालेल्या व्हिडिओंमध्ये जेबेल अली परिसरातील आकाश काळ्या धुराने व्यापलेले दिसत आहे.
इराणच्या वृत्तसंस्थेने अमिराती अधिकाऱ्यांच्या हवाल्याने दिलेल्या माहितीनुसार, अवघ्या 20 मिनिटांत किमान सात स्फोट झाले असून, त्यांच्या तीव्रतेमुळे संपूर्ण परिसर हादरला.
या घटनेचे व्हिडिओ चित्रीकरण केल्याच्या आरोपावरून दोन जणांना अटक करण्यात आल्याचेही वृत्त आहे. मात्र, हे स्फोट हल्ल्यामुळे झाले की औद्योगिक अपघातामुळे, याबाबत अद्याप अधिकृतपणे कोणतीही स्पष्ट माहिती देण्यात आलेली नाही. तसेच या घटनेत कोणतीही जीवितहानी किंवा मोठे आर्थिक नुकसान झाल्याची पुष्टीही अद्याप झालेली नाही.
सोशल मीडियावर समोर आलेल्या व्हिडिओंमध्ये स्फोटांनंतर निवासी भागाजवळील आकाशात काळ्या धुराचे मोठे लोट उसळताना दिसत आहेत. जवळील अल फुरजान परिसरातील रहिवाशांनीही स्थानिक माध्यमांना सांगितले की, स्फोटांची बातमी समोर आली त्याच वेळी त्यांनी जोरदार स्फोटांसारखे आवाज ऐकले.
दरम्यान, इराकी वृत्तमाध्यमांनी दावा केला आहे की अमेरिका-इराण तणावाच्या पार्श्वभूमीवर यमनमधून संयुक्त अरब अमिरातीवर (UAE) क्षेपणास्त्र हल्ला करण्यात आला. मात्र, अमिराती माध्यमांनी स्फोटांच्या कारणाबाबत अद्याप कोणतीही अधिकृत माहिती दिलेली नाही. दुसरीकडे, नासाच्या थर्मल इमेजिंगमधून बंदरालगत असलेल्या इंधन साठवण आणि हस्तांतरणासाठी वापरल्या जाणाऱ्या गोदामाला आग लागल्याचे दिसून आले आहे.
दुबई शहराच्या मध्यवर्ती भागापासून सुमारे 25 मैल दक्षिण-पश्चिमेला असलेले जेबेल अली हे संयुक्त अरब अमिरातीतील अत्यंत महत्त्वाचे व्यापारी आणि औद्योगिक केंद्र आहे. येथे पाम जेबेल अली हा कृत्रिम बेटांचा प्रकल्प, जगातील सर्वात मोठ्या मानवनिर्मित बंदरांपैकी एक बंदर आणि आंतरराष्ट्रीय व्यापाराला चालना देणारा फ्री ट्रेड झोन आहे. त्यामुळे जागतिक मालवाहतूक आणि व्यापाराच्या दृष्टीने या परिसराला विशेष महत्त्व आहे.
अमेरिका-इराण तणावाच्या काळात संयुक्त अरब अमिरात नेहमीच उच्च सतर्कतेवर असते. कारण, इराणकडून अमेरिकेच्या सहयोगी देशांवर होणाऱ्या संभाव्य प्रत्युत्तरात्मक कारवायांमध्ये युएई हा संवेदनशील लक्ष्य मानला जातो.
