चिपळूण: रत्नागिरी जिल्ह्यातील चिपळूण शहरातून एक धक्कादायक बातमी समोर आली आहे. शनिवारी रात्री १० वाजण्याच्या सुमारास चिपळूणच्या बाजारपुलावरून एका अज्ञात तरुणाने वाशिष्ठी नदीत उडी घेतल्याची घटना घडली आहे. या प्रकारामुळे परिसरात खळबळ उडाली असून, प्रशासनाकडून शोधमोहीम हाती घेण्यात आली आहे.
मिळालेल्या माहितीनुसार, संबंधित तरुणाने पुलावरून नदीत उडी घेतल्याचे काही प्रत्यक्षदर्शींनी पाहिले आणि तात्काळ पोलिसांना याची वर्दी दिली. घटनेची माहिती मिळताच चिपळूण पोलीस आणि स्थानिक रेस्क्यू टीम तातडीने घटनास्थळी दाखल झाले. पुलावर या तरुणाच्या मालकीच्या चप्पल आणि घड्याळ सापडल्याने त्याने हे टोकाचे पाऊल उचलल्याचा संशय व्यक्त केला जात आहे. मात्र, या घटनेमागील नेमकी कारणे किंवा तरुणाची ओळख अद्याप पटलेली नाही.
नदीच्या प्रवाहाचा वेग आणि रात्रीची वेळ यामुळे शोधकार्यात अडथळे येत असले, तरी अत्यंत सावधगिरीने बचावकार्य सुरू आहे. पोलिसांनी या प्रकरणाची गांभीर्याने दखल घेतली असून, तरुणाचा शोध घेण्याचे काम युद्धपातळीवर सुरू आहे. या घटनेमुळे बाजारपुलावर नागरिकांनी मोठी गर्दी केली होती, त्यांना सुरक्षित अंतर राखण्याचे आवाहन पोलिसांनी केले आहे. अद्याप तरुणाचा शोध लागलेला नसून, पोलीस या प्रकरणाचा अधिक तपास करत आहेत.
