८ जणांवर गुन्हा दाखल
चिपळूण: चिपळूण तालुक्यातील अलोरे-शिरगाव येथील ‘साफ यीस्ट कंपनी’ मध्ये घुसून व्यवस्थापकांना धमकावणे आणि खंडणीसदृश मागणी केल्याप्रकरणी तब्बल आठ आरोपींविरुद्ध गंभीर स्वरूपाचे गुन्हे दाखल करण्यात आले आहेत. कंपनीच्या आवारात दोन वेगवेगळ्या दिवशी, म्हणजे २१ सप्टेंबर २०२५ आणि २२ सप्टेंबर २०२५ रोजी घडलेल्या या घटनेमुळे स्थानिक औद्योगिक क्षेत्रात खळबळ उडाली आहे.
या प्रकरणी कंपनीचे व्यवस्थापक राजेंद्र अनंत आंबेकर (वय ५९, रा. रावतळे, चिपळूण) यांनी चिपळूण पोलीस ठाण्यात तक्रार दाखल केली आहे. फिर्यादी आंबेकर हे ‘साफ यीस्ट कंपनी प्रा. लि.’ मध्ये व्यवस्थापक पदावर कार्यरत आहेत. त्यांच्या तक्रारीनुसार, दिनांक २१ सप्टेंबर २०२५ रोजी दुपारी २ वाजता, निवृत्ती केशव गजमल, समिर गजमल आणि अमिल गजमल हे तिघे जण कंपनीचे कामगार नसतानाही बेकायदेशीरपणे कंपनीत शिरले. त्यांनी व्यवस्थापनाला कोणतीही सेवा न पुरवता दरमहा पंचवीस हजार रुपये (₹२५,०००/-) देण्याची मागणी केली. तसेच, कंपनीच्या कामासाठी ३० कंत्राटी कामगार पुरवण्याचे कंत्राट त्यांना मिळावे आणि आपल्याला कायमस्वरूपी ₹२५,०००/- पगाराची नोकरी मिळावी, अशा मागण्या करून त्यांनी दबाव आणला.
यानंतर, दुसऱ्याच दिवशी, म्हणजेच २२ सप्टेंबर २०२५ रोजी सायंकाळी ६ वाजता, पुन्हा एकदा आरोपी क्रमांक १ ते ४, ज्यात शशिकांत गजमल (पूर्ण नाव माहित नाही) आणि अन्य चार अज्ञात इसम, असे एकूण आठ आरोपी कंपनीच्या आवारात दाखल झाले. या आरोपींनी कंपनीच्या आवारातील पावसाचे पाणी बाहेर जाण्याचे गटार दगड आणि मातीने पूर्णपणे बंद केले. त्यानंतर त्यांनी व्यवस्थापनाला दमदाटी करत “कंपनीचे पाणी कंपनीच्या बाहेर सोडायचे नाही,” अशी थेट धमकी दिली.
फिर्यादी राजेंद्र आंबेकर यांच्या तक्रारीवरून पोलिसांनी दिनांक २७/०९/२०२५ रोजी रात्री ०१.२२ वाजता या आठ आरोपींविरुद्ध गुन्हा (गु.आर.नं. ६०/२०२५) दाखल केला आहे. पोलिसांनी आरोपींवर भारतीय न्यायसंहिता अधिनियम २०२३ (BNS) नुसार कलम ३०८(३) (बळजबरी), ३५१(२) (गैरवर्तन करून धमकी देणे), ३३२(क), ३२६(क) आणि १८९(२) (सार्वजनिक उपद्रव) यांसारखी गंभीर कलमे लावली आहेत. गणे, चिपळूण येथील रहिवासी असलेल्या सर्व आरोपींचा शोध घेण्यासाठी चिपळूण पोलिसांनी तातडीने तपास सुरू केला आहे. औद्योगिक कंपनीत अशा प्रकारे घुसखोरी करून धमक्या देण्याच्या या गंभीर घटनेमुळे परिसरात तणावाचे वातावरण निर्माण झाले आहे.
