रत्नागिरी:- सिंधुदुर्गहून रत्नागिरीकडे येत असताना रस्त्यावरील कामामुळे केलेल्या मार्गातील बदलाचा फलक न दिसल्याने एक कार थेट कठड्याला धडकून पलटी झाली आणि क्षणातच गाडीने पेट घेतल्याची धक्कादायक घटना रत्नागिरी-पाली मार्गावरील हातखंबा टॅपजवळ आज रविवारी दुपारच्या सुमारास घडली.
या भीषण अपघातात गाडीतील डॉक्टर वडील आणि त्यांची लहान मुलगी दैव बलवत्तर म्हणून आश्चर्यकारकरित्या बचावले आहेत. या घटनेमुळे सार्वजनिक बांधकाम विभागाच्या कामकाजावर प्रश्नचिन्ह निर्माण झाले असून, प्रवाशांच्या सुरक्षेसाठी तात्काळ स्पष्ट सूचना फलक लावण्याची मागणी जोर धरू लागली आहे.
मिळालेल्या सविस्तर माहितीनुसार, सिंधुदुर्ग येथील रहिवासी असलेले डॉ. मिहिर मुरलीधर प्रभुदेसाई (वय ३९) हे आपल्या मुलीसोबत (MH-07 Q 8032) या क्रमांकाच्या कारने रत्नागिरीच्या दिशेने येत होते. सध्या हातखंबा-पाली परिसरात रस्त्याच्या दुरुस्तीचे काम सुरू असल्याने वाहतुकीच्या मार्गात बदल करण्यात आला आहे. मात्र, हा बदल दर्शवणारा सूचना फलक स्पष्टपणे दिसत नसल्याने डॉ. प्रभुदेसाई यांना रस्त्याचा अंदाज आला नाही.
भरधाव वेगात असलेली त्यांची कार नियंत्रणाबाहेर जाऊन थेट रस्त्याच्या कडेला असलेल्या दगडाच्या कठड्यावर जोरात आदळली. धडक इतकी भीषण होती की, गाडी जागेवरच पलटी झाली. काही বুঝেपर्यंत गाडीने अचानक पेट घेतला आणि काही क्षणातच आगीच्या ज्वाळांनी संपूर्ण गाडीला वेढले.
गाडीने पेट घेण्यापूर्वीच प्रसंगावधान राखून डॉ. प्रभुदेसाई आणि त्यांची मुलगी गाडीतून बाहेर पडल्याने मोठा अनर्थ टळला. या अपघातात डॉ. मिहिर प्रभुदेसाई जखमी झाले असून, त्यांच्या मुलीला किरकोळ दुखापत झाली आहे. दोघांनाही तातडीने उपचारासाठी हलवण्यात आले असून, सध्या त्यांची प्रकृती स्थिर आणि सुखरूप असल्याचे समजते.
अग्निशमन दल घटनास्थळी दाखल
अपघाताची माहिती मिळताच परिसरातील नागरिकांनी घटनास्थळी धाव घेतली. तात्काळ अग्निशमन दलाला पाचारण करण्यात आले. अग्निशमन दलाच्या जवानांनी घटनास्थळी पोहोचून पाण्याचा मारा करत गाडीला लागलेली आग विझवली. मात्र, तोपर्यंत गाडी जळून पूर्णपणे खाक झाली होती. या अपघातामुळे रत्नागिरी-पाली मार्गावरील वाहतूक काही काळासाठी ठप्प झाली होती, ज्यामुळे रस्त्यावर वाहनांच्या लांबच लांब रांगा लागल्या होत्या.
