ग्रामस्थांना कायदे आणि शासकीय योजनांची माहिती
रत्नागिरी: महाराष्ट्र राज्य विधी सेवा प्राधिकरण, मुंबई यांच्या महत्त्वपूर्ण निर्देशानुसार आणि प्रभारी प्रमुख जिल्हा न्यायाधीश श्री विनोद जाधव यांच्या आदेशानुसार, जिल्हा विधी सेवा प्राधिकरण, रत्नागिरी च्यावतीने नुकतेच दुर्गम भागातील मौजे माचाळ येथे भव्य विधी साक्षरता शिबिराचे यशस्वी आयोजन करण्यात आले. या शिबिरामुळे माचाळ परिसरातील ग्रामस्थांना विविध कायदे आणि शासकीय योजनांची उपयुक्त माहिती मिळाली.
या महत्त्वाकांक्षी कार्यक्रमाला जिल्हा विधी सेवा प्राधिकरणाचे सचिव श्री. आर. आर. पाटील यांची विशेष उपस्थिती लाभली. त्यांच्यासोबत गटविकास अधिकारी, लांजा श्री. एच. बी. गिरी, तहसीलदार, लांजा श्रीमती प्रियांका ढोले, जेष्ठ विधिज्ञ श्री. संकेत तुकाराम ढवळ, श्री. झिमन, माचाळ मुचकुंडी पर्यटन विकास सेवा सहकारी संस्थेचे संस्थापक श्री विवेक सांवत, सरपंच श्री. गाडे, विस्तार अधिकारी, ग्रामविकास अधिकारी, तलाठी, मंडळ अधिकारी आणि मोठ्या संख्येने ग्रामस्थ उपस्थित होते.
यावेळी जेष्ठ विधिज्ञ श्री. संकेत तुकाराम ढवळ यांनी ग्रामस्थांना कुळ कायद्या विषयी महत्त्वपूर्ण आणि तपशीलवार माहिती दिली, ज्यामुळे शेतजमीन आणि संबंधित अधिकारांविषयीच्या त्यांच्या अनेक शंका दूर झाल्या. त्याचप्रमाणे, तहसीलदार श्रीमती प्रियांका ढोले यांनी महसूल खात्यामार्फत राबविण्यात येत असलेल्या विविध शासकीय योजनांची माहिती दिली आणि या योजनांचा लाभ कसा घ्यावा याबाबत मार्गदर्शन केले.
जिल्हा विधी सेवा प्राधिकरणाचे सचिव श्री. आर. आर. पाटील यांनी प्राधिकरणाकडून राबविण्यात येणाऱ्या मोफत कायदेविषयक सल्ला व सहाय्य आणि अन्य योजनांबद्दल ग्रामस्थांना मार्गदर्शन केले, ज्यामुळे आर्थिक दुर्बळ घटकांना न्याय मिळवण्यासाठी कायदेशीर मदत सहज उपलब्ध होऊ शकते, याबद्दल जनजागृती झाली. या शिबिरामुळे माचाळ येथील नागरिकांना कायद्याची आणि त्यांच्या हक्कांविषयीची माहिती मिळून सामाजिक न्याय प्रस्थापित होण्यास मदत होणार आहे. या कार्यक्रमाचे सूत्रसंचालन श्री कांबळे यांनी केले, तर सरपंच श्री गाडे यांनी उपस्थितांचे आभार मानले.
