चिपळूण : चिपळूण नगर परिषदमध्ये दिव्यांग व्यक्तींसाठीच्या शासकीय अनुदानाच्या निधीत मोठा गैरव्यवहार झाल्याचा धक्कादायक प्रकार समोर आला आहे. येथील एका अज्ञात महिलेने ‘दिव्यांग ५ टक्के अनुदाना’अंतर्गत वैयक्तिक लाभाच्या योजनेसाठी मंजूर झालेल्या रकमेचा गैरवापर करून चक्क ३ लाख २४ हजार रुपयांची आर्थिक फसवणूक केली आहे. याप्रकरणी संबंधित योजनेचे लाभार्थी तथा नगर परिषदेचे सफाई कामगार संतोष शांताराम मोहिते (रा. रॉयलनगर, चिपळूण) यांनी पोलिसांत तक्रार दाखल केली आहे.
फिर्यादीत नमूद केल्यानुसार, हा फसवणुकीचा प्रकार १८ जानेवारी २०१९ रोजी दुपारच्या सुमारास घडला. चिपळूण नगर परिषदेमध्ये निःसमर्थ व्यक्तींसाठी ५ टक्के अनुदानातून वैयक्तिक लाभाच्या योजनांसाठी निधी राखून ठेवण्यात आला होता. याच निधीचा गैरवापर झाला आहे. आरोपी असलेल्या एका महिलेने ३१ जुलै २०१९ रोजी या योजनेसाठी अर्ज केला आणि तिला मंजूर झालेली रक्कम १८ सप्टेंबर २०१९ रोजी स्वीकारली. ही रक्कम स्वीकारल्यानंतर, त्या लाभार्थी महिलेने सदर निधीचा ज्या कारणांसाठी तो मंजूर झाला होता, त्यासाठी वापर न करता त्याचा दुरुपयोग केला. यामुळे नगर परिषदेचे मुख्याधिकारी यांची तब्बल ३ लाख २४ हजार रुपयांची आर्थिक फसवणूक झाली आहे.
या गंभीर गैरव्यवहाराची तक्रार फिर्यादी संतोष मोहिते यांनी ४ ऑक्टोबर २०२५ रोजी दुपारी १२.४७ वाजता चिपळूण नगर परिषदेमध्ये दाखल केली. पुराव्यामध्ये एम.आर.क्र. २२३/२०२५ बी.डी.व्ही.सी.४२० याचा उल्लेख करण्यात आला आहे. सरकारी निधीच्या गैरवापराने शहरातील नागरिकांमध्ये खळबळ उडाली असून, चिपळूण पोलिसांनी एका महिलेविरुद्ध भारतीय दंड संहितेच्या कलम ४२० (फसवणूक) अंतर्गत गुन्हा दाखल केला आहे. या फसवणुकीमागील सूत्रधार कोण आहेत आणि यातील सत्य काय आहे, याचा सखोल तपास पोलीस करत आहेत. सरकारी योजनांच्या निधीत झालेला हा अपहार नगर परिषदेच्या कामकाजावर प्रश्नचिन्ह निर्माण करत आहे.
