बेळगाव: मराठा लाईट इन्फन्ट्री रेजिमेंटल सेंटर येथे गुरुवारी, 4 फेब्रुवारी रोजी मराठा दिवस साजरा करण्यात आला. शरकत युद्ध स्मारक येथे मराठा लाईट इन्फन्ट्री रेजिमेंटल सेंटरचे कमांडंट ब्रिगेडीयर जॉयदीप मुखर्जी यांच्या हस्ते युद्धात हौतात्म्य पत्करलेल्या योद्ध्यांना पुष्पचक्र अर्पण करून श्रध्दांजली वाहण्यात आली.
या समारंभात शहीद वीरांना श्रद्धांजली वाहण्याबरोबरच रेजिमेंटच्या शौर्य, बलिदान आणि राष्ट्राप्रती कर्तव्याच्या चिरस्थायी वारशाची पुष्टी करण्यात आली.
4 फेब्रुवारी 1670 रोजी तानाजी मालुसरे यांनी सिंहगड किल्ला जिंकला होता. मराठा सैन्याने मिळवलेल्या दैदीप्यमान विजयाच्या स्मरणार्थ मराठा लाईट इन्फट्री रेजिमेंटल सेंटर येथे मराठा दिवस साजरा केला जातो. मराठा दिवस कार्यक्रमाला प्रमुख पाहुणे म्हणून मेजर जनरल राकेश मनोचा उपस्थित होते. मेजर जनरल राकेश मनोचा यांच्या हस्ते केक कापण्यात आला. त्यानंतर सांस्कृतिक कार्यक्रम कोल्हापूरच्या कलाकारांनी सादर केला. तरुण आणि तरुणींनी सादर केलेली मर्दानी खेळाची प्रात्यक्षिके देखील उपस्थितांचे आकर्षण ठरली.
मुख्य कार्यक्रमात मराठा लाईट इन्फन्ट्री रेजिमेंटल सेंटर पीटी ग्राउंडवर आयोजित केलेल्या बाराखान्याचा समावेश होता. या कार्यक्रमाचे अध्यक्षपद ब्रिगेडियर जॉयदीप मुखर्जी आणि कुटुंब कल्याण संघटनेच्या अध्यक्षा श्रीमती मृणालिनी मुखर्जी यांनी भुषविले. याप्रसंगी मराठा सेंटरचे स्टेशनचे वरिष्ठ अधिकारी, स्थानिक मान्यवर, माजी सैनिक, कुटुंबे आणि नागरी कर्मचारी उपस्थित होते.
मराठा दिनाच्या या सुव्यवस्थित सोहळ्यामध्ये रेजिमेंटच्या शिस्त आणि योद्धा नीतिमत्तेवर प्रकाश टाकणारा उच्च दर्जाचे मार्शल आर्ट्स प्रदर्शन, त्यानंतर भारताच्या समृद्ध आणि वैविध्यपूर्ण वारशाचे दर्शन घडवणारा सांस्कृतिक -संगीत कार्यक्रमांचा समावेश होता. कलाकारांचा सत्कार करण्यात आला आणि बाराखानाने पिढ्यान पिढ्या परस्पर संवाद, सौहार्द आणि रेजिमेंटल बंध मजबूत करण्यासाठी एक आदर्श वातावरण प्रदान केले.
मराठा दिनानिमित्त 2 ते 4 फेब्रुवारी दरम्यान घेण्यात आलेल्या सरावात 547 अग्निवीरांचा सहभाग होता. तसेच आजपासून 7 फेब्रुवारीपर्यंतच्या सरावामध्ये 543 अग्निवीर भाग घेत आहेत. पहिल्या सत्रातील सरावाचा समारोप तुर्कमट्टी संरक्षण भूमीपासून रेजिमेंटल सेंटरपर्यंत शिस्तबद्ध रूट मार्चने झाला. ज्याने सहनशक्ती, वचनबद्धता आणि परंपरागत प्रशिक्षण यांच्यातील अखंड एकात्मतेचे दर्शन घडवले.
