तेहरीन: मध्यपूर्वेत इस्रायल आणि इराण यांच्यात सुरू असलेल्या युद्धाने आता पायाभूत सुविधा आणि आर्थिक लक्ष्यांवर हल्ले करण्याचा टप्पा गाठला आहे. इराणी माध्यमांच्या अहवालानुसार, गुगल आणि मायक्रोसॉफ्टसह अनेक अमेरिकन तंत्रज्ञान कंपन्यांची कार्यालये व पायाभूत सुविधा इराणच्या नव्या लक्ष्य यादीत समाविष्ट करण्यात आली आहेत.
वृत्तानुसार, इराणच्या इस्लामिक रिव्होल्यूशनरी गार्ड कॉर्प्स (IRGC)शी संबंधित न्यूज एजन्सीने या कंपन्यांची यादी प्रसिद्ध करत त्यांना “इराणची नवी लक्ष्ये” असे संबोधले आहे. या यादीत गुगल, मायक्रोसॉफ्ट, पॅलेंटिर, आयबीएम, एनव्हिडिया आणि ओरेकल यांसारख्या कंपन्यांचा समावेश असून त्यांच्या कार्यालयांचे जाळे इस्रायलमधील विविध शहरांमध्ये तसेच काही खाडी देशांमध्ये पसरलेले आहे. अहवालात म्हटले आहे की या कंपन्यांच्या तंत्रज्ञानाचा वापर इस्रायलच्या लष्करी उद्देशांसाठी केला जात आहे. यामध्ये नमूद केले आहे की, “प्रादेशिक युद्धाचा विस्तार पायाभूत सुविधांवरील संघर्षापर्यंत पोहोचल्याने इराणच्या वैध लक्ष्यांची व्याप्तीही वाढत आहे.”
इराणने अमेरिका आणि इस्रायलशी संबंधित आर्थिक केंद्रे व बँकांनाही लक्ष्य करण्याचा इशारा दिला आहे. खातम अल-अंबिया मुख्यालयाच्या (संयुक्त राष्ट्रांच्या मते IRGCशी संबंधित संस्था) प्रवक्त्याने सांगितले की, “शत्रूंनी आम्हाला अमेरिका आणि झायोनी शासनाशी संबंधित आर्थिक केंद्रे व बँकांवर हल्ले करण्याची मोकळीक दिली आहे.” त्यांनी नागरिकांना अशा बँकांच्या एक किलोमीटर परिसरात न राहण्याचा इशाराही दिला.
हा इशारा अमेरिका-इस्रायलच्या संयुक्त हल्ल्यांच्या प्रत्युत्तरात देण्यात आला आहे. या हल्ल्यांमध्ये इराणमधील एका बँकेवर हल्ला झाला असून अनेक कर्मचाऱ्यांचा मृत्यू झाला होता. प्रत्युत्तरादाखल इराणने अमेरिकन मालमत्ता आणि खाडी देशांतील काही ठिकाणांवर हल्ले केले असून होर्मुझ सामुद्रधुनी अवरोधित करण्याचाही प्रयत्न केला आहे. त्यामुळे ऊर्जा सुरक्षेला मोठे आव्हान निर्माण झाले असून चीन आणि भारतासारख्या आशियाई बाजारांवर त्याचा परिणाम होत आहे.
मध्यपूर्वेतील टेक कंपन्यांची कार्यालये – जसे दुबईतील गुगलचे मुख्यालय आणि यूएईमधील मायक्रोसॉफ्टचे प्रमुख कार्यालय – आता संभाव्य धोक्याच्या कक्षेत आली आहेत. त्यामुळे हे युद्ध आता सायबर आणि पायाभूत सुविधा स्तरावर विस्तारत असल्याचे स्पष्ट होत असून जागतिक अर्थव्यवस्थेवर त्याचे गंभीर परिणाम होण्याची शक्यता व्यक्त केली जात आहे.
