चिपळूण : कापसाळ गावाची कन्या रिया ठसाळे हिने ट्रॅम्पोलिन जिम्नॅस्टिक्स क्षेत्रात उल्लेखनीय कामगिरी केली असून तिची आशियाई चॅम्पियनशिपसाठी निवड झाली आहे.ती स्पर्धेसाठी हाँगकाँगकडे रवाना झाली आहे.
रिया सध्या मुंबईतील नायगाव परिसरात वास्तव्यास आहे. तिचे आई-वडील स्नेहा ठसाळे आणि सचिन ठसाळे यांचे तिच्या क्रीडा प्रवासात मोठे योगदान आहे. लहानपणापासूनच जिम्नॅस्टिक्सची आवड असलेल्या रियाने कठोर मेहनत, शिस्त आणि सातत्यपूर्ण सरावाच्या जोरावर राष्ट्रीय स्तरावर आपली वेगळी ओळख निर्माण केली. आता आशियाई स्पर्धेत भारताचे प्रतिनिधित्व करण्याची संधी मिळाल्याने तिच्या यशात आणखी एक मानाचा तुरा रोवला गेला आहे.रियाच्या या आंतरराष्ट्रीय प्रवासासाठी कुटुंबीय, मित्रपरिवार आणि क्रीडाप्रेमींनी तिला शुभेच्छांचा वर्षाव केला आहे. आगामी स्पर्धेत ती उत्कृष्ट कामगिरी करून भारताचे नाव उज्ज्वल करेल, असा विश्वास व्यक्त केला जात आहे.
