संगमेश्वर: शिवने येथे पोलीस पाटलानेच फोडले गरिबाच्या घराचे कुलूप; बेकायदेशीर ताबा मिळवून भाडेकरू ठेवल्याचा खळबळजनक आरोप

संगमेश्वर : तालुक्यातील मौजे शिवने येथे एका शासकीय पदावरील व्यक्तीनेच सर्वसामान्य नागरिकाचे घर बेकायदेशीरपणे ताब्यात घेण्याचा प्रयत्न केल्याची धक्कादायक तक्रार समोर आली आहे. शिवने गावचे पोलीस पाटील मनोज शिंदे यांनी अतिशय दांडगाई करून एका बंद घराचे कुलूप तोडले आणि त्या घरात थेट भाडेकरू घुसवल्याचा गंभीर आरोप करण्यात आला आहे. या संपूर्ण मनमानी कारभारामुळे भयभीत झालेल्या सौ. स्मिता श्रीराम जुवेकर यांनी अखेर या प्रकरणाची गंभीर दखल घेण्यासाठी महाराष्ट्र राज्याचे गृहमंत्री, रत्नागिरीचे जिल्हाधिकारी, पोलीस अधीक्षक आणि संगमेश्वरचे तहसीलदार यांच्याकडे लेखी अर्जाद्वारे कडक कारवाईची मागणी केली आहे. एका जबाबदार पोलीस पाटलावरच अशा स्वरूपाचे गंभीर आरोप झाल्याने संपूर्ण संगमेश्वर परिसरात आणि रत्नागिरी जिल्ह्यात या घटनेची जोरदार चर्चा सुरू आहे.
पीडित स्मिता जुवेकर यांनी संगमेश्वर पोलीस ठाण्याच्या पोलीस निरीक्षकांना दिलेल्या तक्रार पत्रात नमूद केले आहे की, शिवने ग्रामपंचायत हद्दीत वारसा हक्काने मिळालेले घर क्रमांक ४३६ हे त्यांचे स्वतःच्या हक्काचे घर असून ते ‘इंदिरा आवास घरकुल योजने’ अंतर्गत बांधलेले आहे. या घराची सर्व कागदपत्रे, घरपट्टी आणि वीजबिल स्मिता जुवेकर यांच्याच नावे असून त्या सर्व कर नियमितपणे भरतात. सध्या जुवेकर कुटुंब देवरुख येथे भाड्याच्या घरात राहून मजुरी करून आपला उदरनिर्वाह चालवत असले, तरी सुट्टीच्या दिवशी व सणासुदीला ते आपल्या शिवने येथील घरात नेहमी ये-जा करत असतात. असे असतानाही, मंगळवार दिनांक २६ मे २०२६ रोजी पोलीस पाटील मनोज शिंदे यांनी जुवेकर कुटुंबाची कोणतीही पूर्वपरवानगी न घेता त्यांच्या बंद घराचे कुलूप तोडले. एवढेच नव्हे तर, या घरात जुवेकर कुटुंबाचे दैनंदिन वापराचे कपडे, महत्त्वाचे दस्तऐवज आणि मौल्यवान वस्तू असतानाही, पोलीस पाटलांनी तुरळ येथील ‘जाधव’ नामक एका दांपत्याला बेकायदेशीरपणे त्या घरात भाडेकरू म्हणून ठेवून दिले आहे.
या गंभीर प्रकाराबाबत तक्रार करताना पीडित महिलेने पोलीस पाटलांच्या धमक्यांचाही पाढा वाचला आहे. मनोज शिंदे यांनी यापूर्वीही जुवेकर यांच्या पतीला फोन करून बेकायदेशीर पैशांची मागणी केली होती आणि सध्या ते संपूर्ण कुटुंबाला अश्लील शिवीगाळ करत सातत्याने धमकावत आहेत. कायद्याचे रक्षकच जेव्हा अशा प्रकारे गरिबांच्या मालमत्तेवर बेकायदेशीर ताबा मिळवून भक्षक बनतात, तेव्हा सामान्य जनतेने न्यायासाठी कोणाकडे जायचे, असा संतप्त सवाल या निमित्ताने उपस्थित होत आहे. या सततच्या त्रासामुळे जुवेकर कुटुंब सध्या प्रचंड दहशतीखाली वावरत असून त्यांनी तातडीने न्यायाची गुहार लावली आहे. या प्रकरणाची संगमेश्वर पोलीस ठाण्यात रीतसर नोंद झाली असून, शासकीय पदाचा गैरवापर करणाऱ्या या मुजोर पोलीस पाटलावर पोलीस प्रशासन आता नेमकी काय कारवाई करणार, याकडे तालुक्यासह संपूर्ण जिल्ह्याचे लक्ष वेधले गेले आहे.