रत्नागिरी: येथील प्रसिद्ध परकार हॉस्पिटलमधील डायलिसिस विभागात एअर कंडिशनर (AC) यंत्रणेमध्ये तांत्रिक बिघाड झाल्यामुळे अचानक आग लागल्याची दुर्दैवी घटना घडली. या घटनेबाबत परकार हॉस्पिटल प्रशासनाकडून अधिकृत माहिती देण्यात आली आहे. रुग्णालय प्रशासनाने दिलेल्या माहितीनुसार, आग लागल्याचे समजताच तिथल्या कर्मचाऱ्यांनी कमालीची सतर्कता, तत्परता आणि उत्कृष्ट समन्वय दाखवत परिस्थिती तातडीने नियंत्रणात आणली. सुदैवाने या घटनेत कोणत्याही रुग्णाला, नातेवाईकाला किंवा कर्मचाऱ्याला कोणतीही दुखापत झालेली नाही आणि सर्वजण सुरक्षित आहेत.
रुग्णांच्या सुरक्षिततेला सर्वोच्च प्राधान्य देत, खबरदारीचा उपाय म्हणून सर्व डायलिसिस रुग्णांना तातडीने जवळच्या इतर केंद्रांमध्ये सुरक्षितपणे स्थलांतरित करण्यात आले असून, त्यांच्या उपचारांमध्ये कोणताही खंड पडू दिलेला नाही, असेही हॉस्पिटलने स्पष्ट केले आहे. सध्या प्रभावित झालेल्या विभागाची संपूर्ण सुरक्षा तपासणी आणि आवश्यक दुरुस्तीची कामे सुरू असून, सर्व सुरक्षा मानकांची पूर्तता करून ही सेवा लवकरात लवकर पुन्हा सुरू करण्यासाठी प्रयत्न केले जात आहेत. या संकटसमयी मदतीसाठी धावून आलेल्या आपत्कालीन सेवा यंत्रणा, आरोग्य कर्मचारी आणि नागरिकांचे आभार मानत, “रुग्णांची सुरक्षितता हीच आमची सर्वोच्च प्राथमिकता आहे,” असा विश्वास परकार हॉस्पिटल प्रशासनाने व्यक्त केला आहे.
