रत्नागिरी : रत्नागिरी शहराच्या सौंदर्यात भर घालणारा आणि कलेला नवे व्यासपीठ उपलब्ध करून देणारा एक अभिनव उपक्रम आता प्रत्यक्षात येणार आहे. पालकमंत्री उदय सामंत यांच्या संकल्पनेतून माळनाका येथील स्कायवॉकचे रूपांतर आता आकर्षक ‘हँगिंग आर्ट गॅलरी’मध्ये करण्यात येणार आहे.
शालेय विद्यार्थ्यांना आणि नागरिकांना सुरक्षितपणे रस्ता ओलांडता यावा यासाठी काही वर्षांपूर्वी माळनाका येथे स्कायवॉक उभारण्यात आला होता. मात्र अपेक्षित प्रमाणात त्याचा वापर होत नसल्याने या जागेचा अधिक परिणामकारक उपयोग करण्याचा निर्णय घेण्यात आला आहे. त्यातूनच स्कायवॉकवर हँगिंग आर्ट गॅलरी उभारण्याची अभिनव कल्पना साकार होत आहे.
विशेष म्हणजे, रस्त्यावरील स्कायवॉकवर उभारली जाणारी ही हँगिंग आर्ट गॅलरी राज्यातील पहिल्यापैकी किंवा एकमेव अशा प्रकारची संकल्पना असल्याचे बोलले जात आहे. या गॅलरीमध्ये विविध थोर व्यक्तिमत्त्वांची चित्रे, सामाजिक संदेश देणारी पोस्टर्स, सांस्कृतिक वारशाचे दर्शन घडवणारी कलाकृती तसेच नामवंत कलाकारांच्या उत्कृष्ट कलाकृती प्रदर्शित केल्या जाणार आहेत.
यासोबतच स्थानिक आणि उदयोन्मुख कलाकारांनाही आपल्या कलागुणांचे प्रदर्शन करण्याची संधी उपलब्ध होणार आहे. त्यामुळे ही गॅलरी केवळ आकर्षणाचे केंद्र न राहता नव्या कलाकारांसाठी प्रेरणास्थान ठरणार आहे.
स्कायवॉकवरून ये-जा करणाऱ्या नागरिकांना आता प्रवासासोबतच कलेचा आनंदही घेता येणार आहे. लहान मुलांपासून ज्येष्ठ नागरिकांपर्यंत सर्वांसाठी ही जागा एक वेगळा अनुभव देणारी ठरेल. फावल्या वेळात कला रसिकांना येथे फेरफटका मारत विविध कलाकृतींचा आस्वाद घेण्याची संधी मिळणार आहे.
रत्नागिरीच्या नागरी जीवनात कला, संस्कृती आणि सौंदर्य यांचा संगम घडवणारा हा उपक्रम शहरासाठी एक नवे आकर्षण ठरणार असून, माळनाका परिसराला एक वेगळी ओळख मिळवून देणार असल्याची भावना नागरिकांकडून व्यक्त होत आहे.
“सुरक्षिततेसाठी उभारलेला स्कायवॉक आता कलेचा सेतू ठरणार असून, रत्नागिरीच्या सौंदर्यात आणखी एका आकर्षक दालनाची भर पडणार आहे.”
