सोलापूर: ‘सैराट’ या गाजलेल्या मराठी चित्रपटातून ‘सल्या’च्या भूमिकेतून घराघरात पोहोचलेला अभिनेता अरबाज शेख याच्या कुटुंबावर सध्या कठीण प्रसंग ओढवला आहे. अरबाजच्या वडिलांची प्रकृती खालावल्याने त्यांच्यावर सोलापूर येथील वळसंगकर हॉस्पिटलमध्ये उपचार सुरू आहेत. अशा कठीण परिस्थितीत राज्याचे उद्योगमंत्री उदय सामंत यांनी संवेदनशीलतेचे दर्शन घडवत अरबाजच्या वडिलांच्या उपचारासाठी एक लाख रुपयांची आर्थिक मदत जाहीर केली आहे. मंत्री सामंत यांच्यावतीने हा धनादेश नुकताच अरबाज शेख याच्याकडे सुपूर्द करण्यात आला, ज्यामुळे उपचारांच्या खर्चाचा मोठा ताण हलका होण्यास मदत होणार आहे.
या घटनेची माहिती मिळताच उपमुख्यमंत्री वैद्यकीय मदत कक्षाचे प्रमुख मंगेश चिवटे यांनी सकाळी सोलापूरमधील रुग्णालयात धाव घेतली. त्यांनी अरबाज आणि त्याच्या कुटुंबीयांची भेट घेऊन वडिलांच्या प्रकृतीची आस्थेवाईकपणे विचारपूस केली. परिस्थितीचे गांभीर्य लक्षात घेऊन मंत्री उदय सामंत यांनी तत्काळ दखल घेतली आणि मदतीचा हात पुढे केला. एका उदयोन्मुख कलाकारावर ओढवलेल्या या संकटकाळात उद्योगमंत्र्यांनी दाखवलेल्या या तत्परतेचे आणि दातृत्वाचे सर्व स्तरातून कौतुक होत आहे. ही मदत अरबाजच्या वडिलांच्या पुढील उपचारांसाठी अत्यंत मोलाची ठरणार असून, यामुळे कुटुंबाला मोठा आधार मिळाला आहे.
