पुणे: राष्ट्रवादी काँग्रेसचे खासदार पार्थ पवार आणि कायनात दारा यांचा साखरपुडा सोहळा पुण्यातील एका नामांकित हॉटेलमध्ये अत्यंत साध्या आणि कौटुंबिक वातावरणात पार पडला असून, या खासगी सोहळ्यास मोजक्याच पाहुण्यांना निमंत्रित करण्यात आले होते.
या महत्त्वपूर्ण साखरपुड्यास पवार कुटुंबीय आणि शरद पवार यांच्यासह मुख्यमंत्री देवेंद्र फडणवीस, उपमुख्यमंत्री एकनाथ शिंदे, खासदार सुप्रिया सुळे, सुनील तटकरे, धनंजय मुंडे, आदिती तटकरे, निलेश लंके, शशिकांत शिंदे व दत्ता भरणे यांसारख्या राज्यातील अनेक प्रमुख राजकीय नेत्यांनी आवर्जून उपस्थिती दर्शवून भावी वधू-वरांना पुढील आयुष्यासाठी शुभेच्छा दिल्या.
वधू कायनात दारा या मुळच्या चंदिगढच्या असून सध्या त्या दिल्ली येथे वास्तव्यास आहेत. त्यांनी आपले शालेय शिक्षण दिल्लीतील ‘द ब्रिटिश स्कूल’मधून पूर्ण केले आहे, तर उच्च शिक्षणासाठी त्यांनी जगप्रसिद्ध ‘द लंडन स्कूल ऑफ इकॉनॉमिक्स’ची वाट धरली होती. उच्च शिक्षण पूर्ण केल्यानंतर त्यांनी भारतातील अग्रगण्य इंग्रजी वृत्तवाहिनी असलेल्या एनडीटीव्ही (NDTV) मध्ये आउटपुट एडिटर आणि रिपोर्टर म्हणून अत्यंत महत्त्वाची जबाबदारी पार पाडली आहे.
पार्थ पवार आणि कायनात दारा यांचा विवाहसोहळा आगामी २७ फेब्रुवारी २०२७ रोजी बारामती येथे आयोजित करण्यात आला आहे. खासदार पार्थ अजित पवार यांच्या जीवनसाथी म्हणून आणि उपमुख्यमंत्री सुनेत्रावहिनी पवार यांची सून म्हणून कायनात दारा लवकरच सार्वजनिक जीवनात प्रवेश करणार आहेत.
