आकर्षक वास्तूने रत्नागिरी नगरपरिषदेला नवे रूप; कारभार होणार अधिक गतिमान

रत्नागिरी : रत्नागिरी शहराच्या विकासाला नवी दिशा देतानाच नगरपरिषदेच्या प्रशासकीय कामकाजाला आधुनिक स्वरूप देण्यासाठी आकर्षक आणि सुसज्ज वास्तू उभारण्यात आली आहे. रत्नागिरी नगरपरिषदेची ही नवी प्रशासकीय इमारत आता पूर्णत्वास आली असून, लवकरच तिचे उद्घाटन होणार आहे.

पालकमंत्री उदय सामंत यांनी रत्नागिरीतील विविध प्रशासकीय इमारती आधुनिक पद्धतीने विकसित करण्याचा उपक्रम हाती घेतला आहे. त्याचाच एक भाग म्हणून नगरपरिषदेची ही देखणी वास्तू उभारण्यात आली आहे. आधुनिक बांधकामशैली, प्रशस्त परिसर आणि आवश्यक प्रशासकीय सुविधांमुळे ही इमारत शहराच्या वैभवात भर घालणारी ठरणार आहे.

नव्या प्रशासकीय वास्तूमुळे नगरपरिषदेचे विविध विभाग एकाच ठिकाणी अधिक सुसूत्रपणे कार्यरत होण्यास मदत होणार असून, प्रशासकीय कामकाजाला गती मिळण्याची अपेक्षा आहे. नागरिकांना विविध कामांसाठी अधिक चांगल्या सुविधा उपलब्ध होऊन सेवा देण्याची प्रक्रिया अधिक प्रभावी होण्यासही हातभार लागणार आहे.

रत्नागिरीच्या बदलत्या विकासाचे प्रतीक ठरणारी ही नवी वास्तू लवकरच नागरिकांच्या सेवेत दाखल होणार असल्याने शहराच्या प्रशासकीय व्यवस्थेला आधुनिक रूप मिळणार आहे.