खेड: मुंबई-गोवा महामार्गावरील बोरघर गावाजवळ एका भरधाव कारवरील चालकाचे नियंत्रण सुटल्याने कार पलटी होऊन अपघात झाला. या अपघातात चार प्रवासी जखमी झाले असून, त्यापैकी एक महिला गंभीर जखमी आहे. ही घटना रविवारी (आज) सकाळी ९ वाजण्याच्या सुमारास घडली. सर्व जखमींना तातडीने कळंबणी येथील उपजिल्हा रुग्णालयात दाखल करण्यात आले आहे.
एम.एच.०१४ एल.पी. ३१६४ क्रमांकाची हुंडाई ऑरा (Hyundai Aura) कार मुंबईहून संगमेश्वरच्या दिशेने जात होती. कारमध्ये एकूण चार प्रवासी प्रवास करत होते. बोरघरजवळ आल्यानंतर अचानक चालकाचे गाडीवरील नियंत्रण सुटले आणि कार रस्त्यावर पलटी झाली. या अपघातात गाडीतील चारही प्रवासी जखमी झाले आहेत.
जखमींपैकी एका महिलेला गंभीर दुखापत झाल्याचे समजते. अपघातानंतर स्थानिक नागरिकांनी आणि पोलिसांनी तात्काळ मदतकार्य सुरू करून जखमींना कळंबणी उपजिल्हा रुग्णालयात उपचारासाठी दाखल केले. सायंकाळपर्यंत जखमींची नावे समजू शकलेली नाहीत. खेड पोलीस या प्रकरणाचा अधिक तपास करत आहेत.
