जिनिव्हातील ‘Youth Empowerment Forum 2026’साठी अनिरुद्ध निकम यांची निवड

संयुक्त राष्ट्रांच्या व्यासपीठावर युवा नेतृत्व, शाश्वत विकास आणि जागतिक धोरणांवर मांडणार विचार

चिपळूण : सह्याद्रि शिक्षण संस्थेचे कार्याध्यक्ष तथा आमदार शेखर निकम यांचे चिरंजीव अनिरुद्ध शेखर निकम यांची स्वित्झर्लंडमधील जिनिव्हा येथे होणाऱ्या ‘Youth Empowerment Forum 2026’ या आंतरराष्ट्रीय युवा मंचासाठी निवड झाली आहे. ३ ते ६ सप्टेंबर २०२६ या कालावधीत होणाऱ्या या फोरममध्ये जगभरातील सुमारे १०० युवा प्रतिनिधी सहभागी होणार असून, युवा नेतृत्व, जागतिक धोरणे, शाश्वत विकास आणि मानवतावादी राजनय या विषयांवर आंतरराष्ट्रीय स्तरावर विचारविनिमय होणार आहे.

United Nations आणि Center for Global Dialogue & Leadership यांच्या माध्यमातून आयोजित करण्यात येणाऱ्या या फोरममध्ये अनिरुद्ध निकम यांना विविध देशांतील युवा प्रतिनिधी, तज्ज्ञ आणि धोरणनिर्मितीशी संबंधित व्यक्तींशी संवाद साधण्याची संधी मिळणार आहे. जागतिक प्रश्नांकडे व्यापक दृष्टिकोनातून पाहण्याबरोबरच युवा नेतृत्वाच्या माध्यमातून शाश्वत विकासासाठी प्रभावी योगदान देण्याच्या विविध संधींची या मंचावर चर्चा होणार आहे.

फोरमच्या कालावधीत संयुक्त राष्ट्रांचे जिनिव्हा येथील मुख्यालय, World Trade Organization (WTO) आणि International Labour Organization (ILO) या आंतरराष्ट्रीय संस्थांना अभ्यासभेटी आयोजित करण्यात आल्या आहेत. या भेटीदरम्यान संबंधित संस्थांचे कामकाज, धोरणात्मक विषय, विशेष ब्रीफिंग तसेच विविध क्षेत्रांतील तज्ज्ञांशी संवाद साधण्याची संधी सहभागी युवा प्रतिनिधींना मिळणार आहे. त्याचबरोबर Leadership and Skill Building आणि Humanitarian Diplomacy या विषयांवर विशेष कार्यशाळाही होणार आहेत.

या फोरममधील UN Sustainable Development Goals Grant Pitch Competition हे विशेष आकर्षण ठरणार आहे. संयुक्त राष्ट्रांच्या Sustainable Development Goals (SDGs) शी संबंधित कल्पना, प्रकल्प आणि उपक्रम मांडण्याची संधी या स्पर्धेच्या माध्यमातून सहभागी युवांना मिळणार आहे. Youth Empowerment, Global Policy, Sustainable Development, Labour Policy आणि International Trade Policy यांसारख्या व्यापक विषयांवर या निमित्ताने आंतरराष्ट्रीय पातळीवर संवाद घडून येणार आहे.

अनिरुद्ध निकम यांच्या शैक्षणिक प्रवासाची सुरुवात सह्याद्रि शिक्षण संस्थेतून झाली. त्यांनी मराठी माध्यमातून शालेय शिक्षण पूर्ण केल्यानंतर सह्याद्रि कृषी महाविद्यालयातून कृषी विषयातील पदवी प्राप्त केली. त्यानंतर उच्च शिक्षणासाठी ऑस्ट्रेलियातील University of Queensland येथे प्रवेश घेत त्यांनी २०२२ ते २०२४ या कालावधीत M.Sc. Agriculture ही पदव्युत्तर पदवी पूर्ण केली. मराठी माध्यमातून शिक्षण घेत कृषी क्षेत्रातील उच्च शिक्षणासाठी परदेशात गेलेल्या अनिरुद्ध निकम यांनी शिक्षणासोबतच संशोधन क्षेत्रातही योगदान दिले आहे.

ऑस्ट्रेलियातील Queensland Department of Agriculture and Fisheries (QDAF) सोबत त्यांनी कृषी संशोधन क्षेत्रात काम केले आहे. Tropical Fruit Robustness and Post-Harvest Management या ऑस्ट्रेलियन सरकारच्या प्रकल्पाशी संबंधित संशोधनात त्यांनी योगदान दिले. कृषी उत्पादनांची गुणवत्ता, टिकाऊपणा आणि काढणीनंतरचे व्यवस्थापन यांसारख्या विषयांवरील संशोधनाचा अनुभव त्यांच्या शैक्षणिक कारकिर्दीला आंतरराष्ट्रीय परिमाण देणारा ठरला आहे.

त्यांच्या शैक्षणिक आणि संशोधन क्षेत्रातील कामाची दखल घेत Queensland Government आणि University of Queensland यांच्या वतीने डिसेंबर २०२४ मध्ये त्यांना ‘Dean’s Commendation Award’ने गौरविण्यात आले. शैक्षणिक गुणवत्ता आणि संशोधनातील योगदानाची दखल म्हणून या पुरस्काराकडे पाहिले जाते.

शिक्षण आणि संशोधनासोबतच अनिरुद्ध निकम क्रीडा, सामाजिक कार्य, ग्रामीण विकास आणि युवा उपक्रमांमध्येही सक्रिय आहेत. ते चिपळूण तालुका क्रिकेट असोसिएशनचे उपाध्यक्ष म्हणून कार्यरत आहेत. युवा वर्गाला शिक्षण, क्रीडा आणि सामाजिक क्षेत्राशी जोडण्याबरोबरच ग्रामीण विकासाच्या प्रक्रियेत तरुणांचा सहभाग वाढविणाऱ्या विविध उपक्रमांमध्ये त्यांचा सहभाग राहिला आहे. सह्याद्रि शिक्षण संस्थेच्या कार्याध्यक्षपदाची जबाबदारी सांभाळताना शिक्षण क्षेत्रातील संस्थात्मक कार्यातही ते सक्रियपणे सहभागी आहेत.

मराठी माध्यमातील स्थानिक शिक्षणापासून कृषी क्षेत्रातील उच्च शिक्षण, ऑस्ट्रेलियातील पदव्युत्तर शिक्षण, आंतरराष्ट्रीय कृषी संशोधन, क्रीडा आणि संस्थात्मक नेतृत्व असा अनिरुद्ध निकम यांचा प्रवास झाला आहे. या पार्श्वभूमीवर जिनिव्हातील ‘Youth Empowerment Forum 2026’साठी झालेली त्यांची निवड विशेष महत्त्वाची मानली जात आहे. आंतरराष्ट्रीय व्यासपीठावर विविध देशांतील युवा प्रतिनिधी आणि तज्ज्ञांशी संवाद साधत जागतिक प्रश्नांवर विचारमंथन करण्याची मिळणारी संधी त्यांच्या पुढील सामाजिक, शैक्षणिक आणि संस्थात्मक कार्यासाठी महत्त्वपूर्ण ठरणार आहे. कोकणातील युवा पिढीसाठीही हा प्रवास प्रेरणादायी ठरणारा आहे.