कोकण प्रवास होणार अधिक सुरक्षित; ‘ब्लॅक स्पॉट’ ॲपचा वापर करण्याचे आवाहन

पनवेल : आगामी गणेशोत्सवाच्या पार्श्वभूमीवर मुंबई-पुणे, मुंबई-गोवा आणि कोकणाकडे जाणाऱ्या महामार्गांवर वाहनांची मोठी गर्दी होण्याची शक्यता आहे. या काळात गणेशभक्त, चाकरमानी तसेच अन्य वाहनचालकांचा प्रवास सुरक्षित व्हावा, यासाठी प्रादेशिक परिवहन कार्यालय, पनवेल यांनी ‘Black Spot RTO Panvel’ हे विशेष मोबाईल ॲप उपलब्ध करून दिले आहे. कोकणच्या दिशेने प्रवास करण्यापूर्वी वाहनचालकांनी हे ॲप मोबाईलमध्ये डाऊनलोड करून त्याचा वापर करावा, असे आवाहन पनवेल आरटीओने केले आहे.

महामार्गावरील अपघातप्रवण ठिकाणे, धोकादायक वळणे आणि संभाव्य धोकादायक क्षेत्रांची माहिती या ॲपच्या माध्यमातून वाहनचालकांना मिळणार आहे. वाहन धोकादायक ठिकाणाच्या जवळ पोहोचल्यावर ॲपकडून अलर्ट देण्यात येणार असल्याने चालकाला वेळेत वेग कमी करून आवश्यक खबरदारी घेता येईल. त्यामुळे अपघाताची शक्यता कमी करण्यास मदत होणार आहे.

‘Black Spot RTO Panvel’ हे ॲप Android आणि iOS या दोन्ही प्लॅटफॉर्मवर मोफत उपलब्ध असून वाहनचालकांनी प्रवास सुरू करण्यापूर्वी ते आपल्या मोबाईलमध्ये डाऊनलोड करावे, असे आरटीओने स्पष्ट केले आहे. गणेशोत्सवाच्या काळात महामार्गांवर वाढणारी गर्दी पाहता वाहन चालविताना वेग मर्यादित ठेवणे, धोकादायक पद्धतीने ओव्हरटेकिंग न करणे आणि वाहतुकीच्या नियमांचे पालन करणे आवश्यक असल्याचेही आरटीओने सांगितले.

चारचाकी वाहनचालकांनी सीटबेल्टचा वापर करावा, तर दुचाकीस्वारांनी हेल्मेट घालावे. मद्यपान अथवा अमली पदार्थांचे सेवन करून वाहन चालवू नये. प्रवासादरम्यान थकवा जाणवत असल्यास किंवा झोप येत असल्यास वाहन सुरक्षित ठिकाणी थांबवून विश्रांती घ्यावी, असे आवाहनही करण्यात आले आहे. ‘सुरक्षित वाहन चालवा आणि बाप्पाच्या आगमनाचा आनंद घेत आपल्या कुटुंबासह सुखरूप घरी पोहोचा’, असा संदेश पनवेल आरटीओने गणेशभक्त आणि वाहनचालकांना दिला आहे.