सेवानिवृत्त महिला शिक्षिकेच्या खुनाचा अवघ्या ४८ तासांत छडा लावल्याबद्दल विशेष कौतुक
चिपळूण: कोकण परिक्षेत्राचे कर्तव्यदक्ष विशेष पोलीस महानिरीक्षक श्री. संजय दराडे (भा.पो.से.) यांनी आज शुक्रवारी, २२ ऑगस्ट रोजी चिपळूण पोलीस ठाण्याला भेट देत, येथील पोलिसांच्या प्रशंसनीय कामगिरीबद्दल त्यांचा सन्मान केला. एका सेवानिवृत्त महिला शिक्षिकेच्या खुनाचा अवघ्या ४८ तासांत छडा लावून आरोपींना अटक केल्याबद्दल, त्यांनी तपास पथकातील अधिकारी व अंमलदारांना प्रशस्तिपत्रे देऊन गौरविले. या कामगिरीमुळे पोलीस दलाचे मनोधैर्य वाढले असून, नागरिकांमध्येही पोलिसांबद्दलचा विश्वास अधिक दृढ झाला आहे.
या भेटीदरम्यान श्री. दराडे यांनी पोलीस अधीक्षक नितीन बगाटे आणि उपविभागीय पोलीस अधिकारी प्रकाश बेले यांच्या उपस्थितीत, व्हिडीओ कॉन्फरन्सिंगद्वारे मासिक गुन्हे आढावा बैठक घेतली. यात त्यांनी सद्यस्थितीतील गुन्ह्यांचा आढावा घेतला आणि भविष्यात गुन्हेगारीवर नियंत्रण ठेवण्यासाठी करावयाच्या उपाययोजनांबाबत महत्त्वाचे मार्गदर्शन केले. समाजातील शांतता आणि सुव्यवस्था राखण्यासाठी पोलीस यंत्रणेने अधिक सतर्क व प्रभावीपणे काम करण्याचे आवाहनही त्यांनी केले.
चिपळूण पोलिसांनी ज्या वेगाने आणि कौशल्याने एका गंभीर गुन्ह्याचा तपास पूर्ण केला, त्याचे विशेष कौतुक श्री. दराडे यांनी केले. त्यांनी दिलेल्या प्रशस्तिपत्रांमुळे पोलिसांना त्यांच्या चांगल्या कामाची पोचपावती मिळाली, ज्यामुळे त्यांना पुढील कार्यासाठी मोठी प्रेरणा मिळाली आहे.
श्री. दराडे यांच्या या भेटीमुळे चिपळूण पोलीस दलाला निश्चितच प्रोत्साहन मिळाले असून, पुढील काळात ते अधिक जोमाने आणि कार्यक्षमतेने काम करतील, अशी अपेक्षा आहे.
यावेळी कोकण परिक्षेत्राचे कर्तव्यदक्ष विशेष पोलीस महानिरीक्षक श्री. संजय दराडे (भा.पो.से.), रत्नागिरी जिल्हा पोलिस अधीक्षक नितीन बगाटे, उपविभागीय पोलीस अधिकारी प्रकाश बेले, आणि इतर पोलिस अधिकारी उपस्थित होते.
