चिपळूण: नवीन शैक्षणिक धोरणानुसार तयार करण्यात आलेल्या बालभारतीच्या इयत्ता सहावीच्या इंग्रजी पाठ्यपुस्तक निर्मिती प्रक्रियेत येथील परशुराम एज्युकेशन सोसायटीच्या प्रशालेतील ज्येष्ठ शिक्षिका सौ. वैशाली अतुल चितळे यांनी गेल्या वर्षभरात अत्यंत महत्त्वपूर्ण योगदान दिले आहे. बालभारतीच्या इंग्रजी पाठ्यपुस्तक निर्मिती मंडळावर निवड झाल्यानंतर त्यांनी या दर्जेदार साहित्य निर्मितीसाठी घेतलेल्या परिश्रमांची दखल घेत बालभारतीने प्रकाशित केलेल्या इयत्ता सहावीच्या इंग्रजी पाठ्यपुस्तकात त्यांच्या नावाचा गौरवपूर्ण उल्लेख केला असून, त्यांच्या या उत्कृष्ट शैक्षणिक कार्याचे सध्या सर्व स्तरांतून कौतुक होत आहे. विद्यार्थ्यांसाठी उपयुक्त आणि दर्जेदार शैक्षणिक साहित्याची निर्मिती करण्यात स्थानिक स्तरावरील शिक्षकांचे योगदान किती मोलाचे ठरू शकते, हेच सौ. चितळे यांच्या या यशाने पुन्हा एकदा अधोरेखित केले आहे.
सौ. वैशाली चितळे यांच्या या उल्लेखनीय आणि संस्थेच्या शैक्षणिक गुणवत्तेला नवी उंची प्राप्त करून देणाऱ्या यशाबद्दल परशुराम एज्युकेशन सोसायटीचे सर्व पदाधिकारी व संचालक मंडळ, तसेच प्रशालेचे मुख्याध्यापक संजय बनसोडे, उपमुख्याध्यापिका सौ. रेवती कारदगे, पर्यवेक्षक श्री. खाडे व श्री. मुंढेकर आणि शाळेतील सर्व शिक्षक व शिक्षकेतर कर्मचाऱ्यांनी त्यांचे मनःपूर्वक अभिनंदन केले आहे. चिपळूणमधील एका ज्येष्ठ शिक्षिकेचा पाठ्यपुस्तक निर्मितीसारख्या अत्यंत महत्त्वाच्या राज्यस्तरीय मंडळात झालेला सहभाग आणि त्यांनी दिलेले योगदान हे संपूर्ण परिसरासाठी अभिमानास्पद ठरले असून, संस्थेच्या वतीने त्यांना पुढील शैक्षणिक वाटचालीस आणि उपक्रमांना हार्दिक शुभेच्छा देण्यात आल्या आहेत.
