सावर्डे : पर्यावरण संवर्धन आणि सावर्डे गावाच्या सौंदर्यीकरणासाठी मुंबई-गोवा राष्ट्रीय महामार्गाच्या दुभाजकामध्ये तब्बल ३७० पाम वृक्षांची लागवड करण्यात आली. चिपळूण-संगमेश्वर विधानसभा मतदारसंघाचे आमदार शेखर निकम आणि जिल्हा परिषद सदस्या सौ. पूजा शेखर निकम यांच्या संकल्पनेतून हा पर्यावरणपूरक उपक्रम साकारण्यात आला असून, या उपक्रमामुळे महामार्गालगतच्या सावर्डे गावाला भविष्यात एक वेगळी आणि आकर्षक ओळख मिळणार आहे. वाढते शहरीकरण आणि घटते हरित क्षेत्र लक्षात घेऊन प्रदूषणावर नियंत्रण ठेवण्यासाठी व भावी पिढ्यांसाठी समृद्ध पर्यावरणाचा वारसा निर्माण करण्यासाठी या उपक्रमाचे आयोजन करण्यात आले होते.
या उपक्रमाचे सर्वात महत्त्वाचे आणि अभिनव वैशिष्ट्य म्हणजे लावण्यात आलेल्या प्रत्येक पाम वृक्षाला संबंधित व्यापारी किंवा स्थानिक व्यक्तीच्या नावाची नेमप्लेट लावण्यात आली आहे. केवळ नाव लावण्यापुरते हे मर्यादित नसून, संबंधित व्यक्तीने ते झाड मोठे होईपर्यंत त्याला नियमित पाणी देणे, खत घालणे आणि त्याची देखभाल करणे, ही जबाबदारी निश्चित करण्यात आली आहे. अनेकदा वृक्षारोपणानंतर झाडांच्या देखभालीअभावी ती नष्ट होतात, ही बाब लक्षात घेऊन आयोजकांनी या वेळी प्रत्येक झाडासाठी स्वतंत्र जबाबदार व्यक्ती निश्चित केली आहे. यामुळे लावलेल्या झाडांची शंभर टक्के जोपासना होऊन ती दीर्घकाळ टिकतील, असा विश्वास आयोजकांनी व्यक्त केला आहे.
या वृक्षारोपण मोहिमेत पंचायत समिती सदस्य शौकत माखजनकर, पोलीस उपनिरीक्षक आबासाहेब पाटील, आरोग्य विभागाचे कर्मचारी, सावर्डे ग्रामपंचायतीचे पदाधिकारी, स्थानिक उद्योजक आणि ग्रामस्थ मोठ्या संख्येने सहभागी झाले होते. सर्वांनी मिळून केलेल्या श्रमदानातून हा उपक्रम यशस्वीपणे पार पडला. लोकसहभाग, सामाजिक बांधिलकी आणि पर्यावरण संवर्धन यांचा सुंदर संगम या उपक्रमातून दिसून येत असून, सावर्डे गावाला हरित आणि स्वच्छ अशी नवी ओळख देणारा हा एक आदर्श उपक्रम ठरला आहे.
