लांजा येथे एक कोटी रुपये खर्चून उभारले जाणार ‘नमो उद्यान; आमदार किरण सामंत यांच्या उपस्थितीत भूमिपूजन

लांजावासीयांना अभिमान वाटेल असे काम होणार :- आमदार किरण सामंत

लांजा : लांजा शहराच्या सौंदर्यात भर घालणाऱ्या आणि लांजावासीयांसाठी आकर्षणाचे केंद्र ठरणाऱ्या ‘नमो उद्यान’ प्रकल्पाचे भूमिपूजन आमदार किरण सामंत यांच्या प्रमुख उपस्थितीत उत्साहात पार पडले. सुमारे एक कोटी रुपये खर्च करून हे भव्य आणि आकर्षक उद्यान उभारण्यात येणार असून, शहराच्या विकासाच्या दृष्टीने हा महत्त्वपूर्ण टप्पा मानला जात आहे.

लांजा शहराचा वाढता विस्तार, नागरिकांची वाढती गरज आणि शहरामध्ये नागरिकांना विरंगुळा, व्यायाम तसेच आनंददायी वातावरण मिळावे, या उद्देशाने ‘नमो उद्यान’ साकारण्यात येणार आहे. आधुनिक सुविधांनी सुसज्ज असलेले हे उद्यान लांजावासीयांसाठी एक सुंदर सार्वजनिक जागा म्हणून विकसित करण्याचा प्रयत्न केला जाणार आहे.

भूमिपूजन कार्यक्रमावेळी आमदार किरण सामंत यांनी लांजा शहराच्या विकासाला आपले प्राधान्य असल्याचे सांगितले. लांजावासीयांना अभिमान वाटेल असे नमो उद्यान उभारले जाणार आहे. शहराच्या विकासासाठी आवश्यक असलेली विविध कामे टप्प्याटप्प्याने पूर्ण करण्यासाठी आपण कटिबद्ध आहोत,असा विश्वास त्यांनी व्यक्त केला.

या उद्यानामध्ये नागरिकांसाठी विविध सोयी-सुविधा उपलब्ध करून देण्याचा प्रयत्न केला जाणार आहे. लहान मुलांसाठी खेळण्याची जागा, नागरिकांसाठी फिरण्यासाठी प्रशस्त परिसर, ज्येष्ठ नागरिकांसाठी विरंगुळ्याची सुविधा, हिरवाई आणि सुशोभीकरणाच्या माध्यमातून आकर्षक वातावरण निर्माण करण्यात येणार आहे. त्यामुळे सकाळ-संध्याकाळ नागरिकांना निवांत वेळ घालवण्यासाठी तसेच आरोग्याची काळजी घेण्यासाठी हक्काची जागा उपलब्ध होणार आहे.

एक कोटी रुपयांच्या निधीतून उभारण्यात येणाऱ्या या नमो उद्यानामुळे लांजा शहराच्या सौंदर्यात मोठी भर पडणार असून, शहराच्या विकासाचा नवा चेहरा नागरिकांसमोर येणार आहे. शहरातील नागरिक, महिला, ज्येष्ठ नागरिक आणि लहान मुलांसाठी हे उद्यान निश्चितच उपयुक्त ठरणार आहे.

आमदार किरण सामंत यांनी विकासकामांमध्ये नागरिकांच्या अपेक्षा आणि गरजा लक्षात घेऊन कामे करण्यावर भर दिला. लांजा शहरासह मतदारसंघातील विविध भागांमध्ये पायाभूत सुविधा, सार्वजनिक सुविधा आणि नागरिकांच्या हिताची कामे करण्यासाठी शासनाच्या माध्यमातून आवश्यक निधी उपलब्ध करून देण्याचा प्रयत्न सुरू असल्याचे त्यांनी सांगितले.

दरम्यान, नमो उद्यानच्या भूमिपूजनामुळे लांजावासीयांमध्ये उत्साहाचे वातावरण निर्माण झाले असून, लवकरच हे उद्यान प्रत्यक्षात आकाराला यावे, अशी अपेक्षा नागरिकांकडून व्यक्त होत आहे. लांजा शहराच्या विकासात आणखी एक मानाचा तुरा म्हणून नमो उद्यानची उभारणी होणार असल्याने नागरिकांमध्ये समाधान व्यक्त होत आहे.

यावेळी नगराध्यक्षा सावली कुरूप, राजू कुरूप, रविंद्र नागरेकर, पोलीस निरीक्षक निळकंठ बगळे, तालुका प्रमुख गुरूप्रसाद देसाई,मुन्ना खामकर, जयवंत शेट्ये, बाबा लांजेकर, योगेश कावतकर, मुख्याधिकारी अभिजीत कुंभार, बांधकाम सभापती वैभव जोइल, पाणी सभापती गुल्ल्याशेठ नेवरेकर, नाना मानकर, सचिन डोंगरकर, शिरीष घोरपडे, सुधाकर कांबळे, गणी मुल्लानी, सर्व नगरसेवक, लांजा वासिय, मोठ्या संख्येने उपस्थित होते.