रत्नागिरी : आरे-गणपतीपुळे मार्गावर असलेल्या वेस्ट बे हॉटेलसमोर बुधवारी (२७ ऑगस्ट २०२५) सायंकाळी चार वाजण्याच्या सुमारास दुचाकींमध्ये झालेल्या भीषण अपघातात तीन जण गंभीर जखमी झाले. या प्रकरणी जयगड सागरी पोलीस ठाण्यात गुन्हा दाखल करण्यात आला आहे.
या अपघातामध्ये महादेव ज्योतीराम कांबळे (वय ३१, रा. आव, ता. पंढरपूर) आणि प्रकाश लाला बनसोडे (वय २६, रा. आरे, ता. पंढरपूर) हे जखमी झाले आहेत. अपघातास कारणीभूत ठरलेला आरोपी सहदेव बिदल लेट (वय २३, रा. खंडाळा, मूळ रा. रायपूर, जि. बिलगुम, पश्चिम बंगाल) हा स्वतःही जखमी झाला आहे.
पोलिसांनी दिलेल्या माहितीनुसार, जखमी चालक महादेव कांबळे हे त्यांची दुचाकी (एम.एच १३ ईई ६४४३) घेऊन गणपतीपुळेहून रत्नागिरीच्या दिशेने जात होते. त्यांच्या मागे प्रकाश बनसोडे बसले होते. ते वेस्ट बे हॉटेलसमोर पोहोचले असता, समोरून येणाऱ्या सहदेव लेट याने आपली दुचाकी (एम.एच ०८ ए झेड ५१४६) अत्यंत निष्काळजीपणे आणि बेदरकारपणे चालवली. विशेष म्हणजे, सहदेवकडे दुचाकी चालवण्याचा वैध परवानाही नव्हता. त्याने रस्त्याच्या परिस्थितीकडे दुर्लक्ष करत महादेव कांबळे यांच्या दुचाकीला जोरदार धडक दिली.
या धडकेमुळे दोन्ही दुचाकींचे मोठे नुकसान झाले. तसेच, महादेव कांबळे, प्रकाश बनसोडे आणि आरोपी सहदेव लेट हे तिघेही गंभीर जखमी झाले आहेत. या घटनेनंतर जयगड सागरी पोलीस ठाण्यात गुन्हा दाखल करण्यात आला असून, सहदेव लेट याच्या विरोधात गुन्हा दाखल करण्यात आला आहे. पोलीस या प्रकरणाचा पुढील तपास करत आहेत.
