दापोली: कोकणच्या निसर्गरम्य दाभोळ खाडीच्या पर्यटनाला आज खऱ्या अर्थाने एक नवी दिशा मिळाली आहे. येथील सुवर्णदुर्ग शिपिंग अँड मरीन सर्व्हिसेस प्रा. लि. यांच्या महत्वाकांक्षी ‘हाऊसबोट’ सेवेचा शानदार शुभारंभ राज्याचे उद्योग व मराठी भाषा मंत्री, तसेच रत्नागिरी जिल्ह्याचे पालकमंत्री, मा. ना. उदयजी सामंत यांच्या हस्ते नुकताच संपन्न झाला. या उद्घाटन सोहळ्यामुळे कोकणातील पर्यटन आणि उद्योग क्षेत्राला नवसंजीवनी मिळणार असून, स्थानिक अर्थव्यवस्थेला मोठी बळकटी मिळेल, असा विश्वास व्यक्त होत आहे. दाभोळ खाडीतील या हाऊसबोट सेवेमुळे पर्यटकांना आता कोकणच्या समुद्रसफरीचा अनुभव अधिक आकर्षक आणि आधुनिक स्वरूपात घेता येणार आहे. खाडीचे मनमोहक सौंदर्य आणि जलसंपदेचा अनुभव घेण्याची एक खास संधी या निमित्ताने उपलब्ध झाली आहे.
‘हाऊसबोट’ संकल्पना महाराष्ट्रात तारकर्ली (सिंधुदुर्ग) येथे यशस्वी झाल्यानंतर आता दाभोळ खाडीतही ती सुरू झाल्याने पर्यटनाच्या नकाशावर दापोली तालुक्याचे स्थान अधिक उंचावणार आहे. महत्त्वाचे म्हणजे, या उपक्रमामुळे स्थानिक तरुणांना रोजगाराच्या नव्या संधी मोठ्या प्रमाणावर उपलब्ध होणार आहेत. पर्यटन क्षेत्रातील हा प्रकल्प केवळ विरंगुळ्याचे साधन नसून, तो एक महत्त्वपूर्ण उद्योग ठरेल. याप्रसंगी बोलताना मा. ना. उदयजी सामंत यांनी या उपक्रमाचे महत्त्व अधोरेखित केले. “राज्य शासनाच्या माध्यमातून अशा उपक्रमांना ‘मुख्यमंत्री रोजगार निर्मिती योजने’चा लाभ देण्यासाठी आणि या व्यवसायाला उद्योगाचा कायदेशीर दर्जा देण्यासाठी सकारात्मक पाऊले उचलली जातील,” असे आश्वासन त्यांनी दिले.
यामुळे पर्यटन उद्योजकांना एक मोठा आधार मिळणार आहे. मंत्री महोदयांनी यावेळी कोकणच्या नैसर्गिक सौंदर्याचे कौतुक करताना “कोकणातील नैसर्गिक सौंदर्य आणि येथील लोकांची ऊर्जा यांमुळे हे क्षेत्र नक्कीच देशभरात आपली खास ओळख निर्माण करेल,” असा ठाम विश्वास व्यक्त केला. या ‘हाऊसबोट’ प्रकल्पासारख्या आधुनिक सुविधांमुळे दाभोळ खाडीचे सौंदर्य नव्या उंचीवर जाईल आणि पर्यटनासोबतच स्थानिक अर्थव्यवस्थेलाही मोठा हातभार लागेल, अशी अपेक्षा आहे. या हाऊसबोट सेवेच्या माध्यमातून कोकणातील पर्यटनाचा नवीन अध्याय सुरू झाला असून, स्थानिक नागरिकांनी आणि पर्यटकांनी या संधीचा लाभ घ्यावा, असे आवाहन सुवर्णदुर्ग शिपिंग अँड मरीन सर्व्हिसेस प्रा. लि. यांच्यावतीने करण्यात आले आहे.
