दापोली /प्रतिनिधी : प्रति महाबळेश्वर म्हणून ओळखले जाणारे दापोली शहर सध्या अक्षरशः गोठले आहे. महाबळेश्वर, पाचगणीसारख्या थंड हिलस्टेशनप्रमाणे दापोलीचा पारा तब्बल ८.५ अंश सेल्सिअसवर घसरला आहे. या वर्षातील तापमानातील ही सर्वाधिक कमी नोंद ठरली आहे. एका बाजूला किमान तापमान इतके खाली आले असताना, दुसरीकडे कमाल तापमान ३०.६ अंश सेल्सिअस इतके नोंदले गेले आहे. यामुळे किमान आणि कमाल तापमानात तब्बल २२ अंशांची मोठी तफावत निर्माण झाली आहे.
दिवसाच्या वेळी हलकी ऊब जाणवत असली तरी, सायंकाळपासून रात्री व पहाटे हवा थंडावा अंगावर काटा आणणारा ठरत आहे. दापोलीत वाढलेली पर्यटकांची गर्दी, स्वच्छ आकाश आणि समुद्रकिनाऱ्याकडे वेगाने वाहणाऱ्या थंड वाऱ्यांमुळे तापमानात अचानक मोठी घट झाली असल्याचं हवामान विभागाचे म्हणणे आहे. या तीव्र थंडीमुळे दापोलीतील नागरिकांनी ऊबदार कपड्यांचा आधार घेतला असून, पर्यटनासाठी आलेल्या नागरिकांना या सुखद थंडीचा अनुभव घेता येत आहे.
