नेपाळमध्ये पुन्हा एकदा जेन-झी रस्त्यावर; कर्फ्यू लागू

काठमांडू: नेपाळमध्ये बारा जिल्ह्यात बुधवारी पुन्हा एकदा जेन-झी रस्त्यावर उतरली आहे.माजी पंतप्रधान केपी शर्मा ओली यांच्या पक्षाच्या, सीपीएन-यूएमएलच्या कार्यकर्त्यांसह जेन-झी मध्ये झालेल्या हिंसक संघर्षानंतर भारताच्या सीमेवर असलेल्या नेपाळच्या बारा जिल्ह्यातील काही भागात कर्फ्यू लागू करण्यात आला.

सिमरा विमानतळाच्या ५०० मीटरच्या परिघात दुपारी १२.३० ते रात्री ८ वाजेपर्यंत कर्फ्यू लागू राहील, असे बारा जिल्हा प्रशासनाने सांगितले.

कम्युनिस्ट पार्टी ऑफ नेपाळ किंवा सीपीएन-यूएमएलच्या विरोधात घोषणाबाजी करत शेकडो जेन-झी युवक तेथे जमले होते. मिळालेल्या माहितीनुसार, सीपीएन-यूएमएलचे सरचिटणीस शंकर पोखरेल आणि पक्षाचे युवा नेते महेश बसनेट यांना घेऊन जाणारे बुद्ध एअरचे विमान काठमांडूहून सिमराला जात असताना हाणामारी सुरू झाली. दोन्ही नेते तिथे सरकार विरोधी रॅलीला संबोधित करणार होते. सिमरामध्ये त्यांच्या आगमनाची बातमी पसरताच, ‘जेन-झी’ निदर्शक घटनास्थळी पोहोचले आणि त्यांनी निषेध करण्यास सुरुवात केली. निषेधादरम्यान उपस्थित असलेल्या स्थानिक सीपीएन-यूएमएल कार्यकर्त्यांशी त्यांची झटापट झाली.या घटनेनंतर, बुद्ध एअरलाइन्सने काठमांडू ते सिमरा पर्यंतच्या सर्व देशांतर्गत उड्डाणे रद्द केल्याचे वृत्त आहे.

१२ सप्टेंबर रोजी विसर्जित झालेल्या प्रतिनिधी सभागृहाची पुनर्स्थापना करण्याच्या मागणीसाठी सीपीएन-यूएमएल नेपाळमध्ये निदर्शने करत आहे. या आठवड्याच्या सुरुवातीपासून सुरू झालेले आंदोलन आता अधिक तीव्र झाले आहे.अनेक ठिकाणी युवक प्रदर्शनकार आणि यूएमएल समर्थकांमध्ये जोरदार चकमकी झाल्या आहेत. कायदा-सुव्यवस्था राखण्यासाठी बारा जिल्ह्यातील प्रमुख ठिकाणी सुरक्षा दलांची तैनाती वाढवण्यात आली आहे. प्रशासन परिस्थितीवर निरंतर लक्ष ठेवून आहे.