खेड: खेड-मंडणगड मार्गावर गुरुवारी दुपारी तीन वाजण्याच्या सुमारास एसटी बस आणि दुचाकी यांच्यात समोरासमोर झालेल्या भीषण अपघातात एका दुचाकीस्वाराचा जागीच मृत्यू झाला. भिलारे आयनी गावानजीक हा दुर्दैवी अपघात घडला असून या घटनेमुळे परिसरात हळहळ व्यक्त केली जात आहे.
या अपघातात आयनी चव्हाणवाडी येथील रहिवासी विलास कोरपे या दुचाकीस्वाराला आपला जीव गमवावा लागला. मिळालेल्या माहितीनुसार, विलास कोरपे हे खेड येथून आपल्या दुचाकीने आयनी गावाकडे जात होते. त्याचवेळी मंडणगडहून खेडच्या दिशेने येणाऱ्या एसटी बसची आणि त्यांच्या दुचाकीची भिलारे आयनी गावाजवळ समोरासमोर जोरदार धडक झाली. ही धडक इतकी भीषण होती की, दुचाकीचा पूर्णपणे चक्काचूर झाला असून एसटी बसचेही मोठ्या प्रमाणात नुकसान झाले आहे. या दुर्दैवी घटनेत विलास कोरपे यांचा जागीच अंत झाला, ज्यामुळे त्यांच्या कुटुंबावर आणि आयनी गावावर शोककळा पसरली आहे.
अपघाताची माहिती मिळताच स्वामी नरेंद्र महाराज संस्थांची रुग्णवाहिका आणि स्थानिक नागरिक मदतीसाठी तत्काळ घटनास्थळी दाखल झाले, मात्र तोपर्यंत उशीर झाला होता. या अपघातामुळे मार्गावर काही काळ वाहतुकीची कोंडी झाली होती. स्थानिक पोलिसांनी तातडीने घटनास्थळी धाव घेऊन वाहतूक सुरळीत केली आणि मृतदेह ताब्यात घेऊन पंचनामा केला. खेड-मंडणगड मार्ग हा वळणावळणाचा आणि अरुंद असल्याने येथे वारंवार अपघात घडत असतात. त्यामुळे वाहनचालकांनी वेगावर नियंत्रण ठेवून आणि वाहतुकीच्या नियमांचे पालन करूनच वाहने चालवावीत, असे आवाहन पोलिसांकडून करण्यात आले आहे. या घटनेनंतर प्रशासनाने या मार्गावर आवश्यक त्या उपाययोजना कराव्यात, अशी मागणी स्थानिक नागरिकांमधून जोर धरू लागली आहे.
