दिल्ली: अमेरिका आणि इराण यांच्यात गेल्या २४ दिवसांपासून युद्ध सुरू आहे. मात्र या संघर्षाच्या पार्श्वभूमीवर अमेरिकेचे राष्ट्राध्यक्ष डोनाल्ड ट्रम्प यांनी युद्ध थांबण्याचे संकेत दिले आहेत.
सोमवारी ट्रम्प यांनी ‘ट्रुथ सोशल’वर पोस्ट शेअर करत सांगितले की, अमेरिकेची इराणसोबत सकारात्मक आणि अर्थपूर्ण चर्चा झाली असून, इराणच्या वीज प्रकल्पांवर आणि ऊर्जा पायाभूत सुविधांवर कोणताही लष्करी हल्ला करण्यास सैन्याला तात्पुरता स्थगिती देण्याचे आदेश दिले जाणार आहेत.
ट्रम्प यांनी आपल्या पोस्टमध्ये लिहिले, “गेल्या दोन दिवसांत अमेरिका आणि इराण यांच्यात मध्य पूर्वेतील परस्पर वैर पूर्णपणे समाप्त करण्याच्या दृष्टीने अत्यंत चांगल्या आणि फलदायी चर्चा झाल्याची माहिती देताना मला आनंद होत आहे.”पुढे त्यांनी म्हटले, “या सखोल, विस्तृत आणि सकारात्मक चर्चांचा सूर आणि वातावरण लक्षात घेता ज्या संपूर्ण आठवडाभर सुरू राहतील मी युद्ध विभागाला निर्देश दिले आहेत की, इराणच्या वीज प्रकल्पांवर आणि ऊर्जा पायाभूत सुविधांवर होणारे सर्व लष्करी हल्ले पाच दिवसांसाठी पुढे ढकलावेत.”या निर्णयाबाबत पुढील घडामोडींवर भाष्य करत ट्रम्प म्हणाले, “हा निर्णय सुरू असलेल्या बैठका आणि चर्चांच्या यशावर अवलंबून असेल. या प्रकरणाकडे लक्ष दिल्याबद्दल धन्यवाद!”
यापूर्वी राष्ट्राध्यक्ष ट्रम्प यांनी इराणला स्ट्रेट ऑफ होर्मुज पूर्णपणे खुला करण्यासाठी ४८ तासांचा अल्टिमेटम दिला होता. त्यांनी इशारा दिला होता की, ठरलेल्या मुदतीत होर्मुज मार्ग खुला न केल्यास इराणच्या वीज प्रकल्पांवर हल्ला केला जाईल.त्यावर प्रत्युत्तर देताना इराणने म्हटले होते की, “जर अमेरिकेने इराणच्या वीज नेटवर्कला लक्ष्य केले, तर इराण इस्रायलच्या वीज प्रकल्पांवर तसेच आखाती प्रदेशातील अमेरिकन तळांना वीज पुरवठा करणाऱ्या प्रकल्पांवर हल्ला करेल.”
ट्रम्प यांचा ४८ तासांचा अल्टिमेटम मंगळवार, २४ मार्चच्या सुरुवातीला संपणार होता. मात्र त्याआधीच ट्रम्प यांनी अमेरिका आणि इराण यांच्यात सकारात्मक चर्चा झाल्याचे सांगत वीज प्रकल्पांवरील संभाव्य हल्ला सध्या पाच दिवसांसाठी स्थगित केल्याची घोषणा केली.
