ट्रॉफी,१५ लाखांची धनराशी आणि १० लाखांचे व्हाउचर जिंकले
मुंबई: रत्नागिरी जिल्ह्यातील संगमेश्वर तालुक्यातील साखरपा गावची कन्या तन्वी कोलते ही बिग बॉस मराठी सीजन 6 ची विजेती ठरली आहे. शंभर दिवसांचा प्रवास, प्रतीक्षा संपली असून अटीतटीच्या सामन्यातून महाराष्ट्राला महाविजेता मिळाला आहे. उत्कंठावर्धक वातावरणात ‘बिग बॉस मराठी सिझन 6’चा विजेता घोषित करण्यात आला.
‘बिग बॉस मराठी सिझन 6’ची धमाकेदार सुरुवात तीन महिन्यांआधी कलर्स मराठी वाहिनीवर झाली. हा शो महाराष्ट्राच्या घराघरांत पोहोचला आणि कानाकोपर्यात फक्त याच कार्यक्रमाची चर्चा सुरू झाली. बिग बॉस मराठीच्या या सिझनमध्ये एकूण 17 सदस्य 100 दिवस 100 कॅमेरांच्या नजरकैदेत राहिले. या घराने आणि महाराष्ट्राने सदस्यांमधील भांडणं, वाद-विवाद, मैत्री, भावनांचे उतार-चढाव आणि नात्यांचे बदलते रंग पाहिले. आता अखेर हा शंभर दिवसांचा रोमांचक प्रवास आज (19 एप्रिल 2026) संपन्न झाला. ‘बिग बॉस मराठी सिझन 6’चा महाअंतिम सोहळा नुकताच मुंबईमध्ये पार पडला. ज्याची वाट संपूर्ण महाराष्ट्र पाहत होता तो क्षण शेवटी आला. सुरुवातीपासूनच प्रेक्षकांची मनं जिंकत घराघरांत पोहोचलेल्या या पर्वाचा भव्य समारोप होत, तन्वी कोलते हिने आपल्या दमदार आणि सातत्यपूर्ण खेळाच्या जोरावर ‘महाविजेती’चा मान पटकावला.
अंतिम क्षणापर्यंत कायम असलेल्या उत्कंठेनंतर विजेतेपदाची घोषणा होताच संपूर्ण वातावरण जल्लोषात न्हाऊन निघालं. विजेत्याला कलर्स मराठीकडून तब्बल 15 लाख धनराशी आणि ट्रॉफी देण्यात आली. त्याचप्रमाणे पु. ना. गाडगीळ आणि सन्सतर्फे तब्बल 10 लाख रुपयांचं वाऊचर, रेवा डायमंडच्या सर्टिफाईड नॅचरल डायमंड ज्वेलरी खरेदीसाठी मिळालं. तुनवाल ई मोटर्सची लिथीनो प्रो ही ई बाइकसुद्धा विजेतीला देण्यात येणार आहे. तर रितेश देशमुख आणि राज शिवाजी चित्रपटाच्या टीमकडून छत्रपती शिवाजी महाराज यांचा सुंदर फोटोदेखील देण्यात आला.
विजेती ठरल्यानंतर भावना व्यक्त करताना तन्वी कोलते म्हणाली, “हा प्रवास माझ्यासाठी खूप खास आणि शिकवणारा ठरला. या घराने मला स्वतःला ओळखायला शिकवलं, प्रत्येक परिस्थितीत ठाम राहायला शिकवलं. प्रेक्षकांनी दिलेलं प्रेम आणि पाठिंबा हीच माझी खरी ताकद आहे. हा विजय मी माझ्या कुटुंबाला आणि माझ्यावर विश्वास ठेवणाऱ्या प्रत्येकाला समर्पित करते. मला सगळे घरात बोलत होते, विचारत होते काय काम केलंस, काय नावं तेव्हा वाईट वाटायचं. पण मी ठरवलं होतं या घरातून बाहेर पडेन तेव्हा सगळ्यांच्या तोंडी माझंच नावं असेल. बिग बॉस मराठीने माझं नाव मोठं केलं आहे, आले होते तन्वी कोलते म्हणून जाते आहे तन्वी कोलते हा ब्रॅण्ड बनून.”
