चिपळूण: कोकणातील गुणवंत खेळाडूंनी आपल्या कौशल्याच्या जोरावर क्रीडा क्षेत्रात नेहमीच ठसा उमटवला आहे. याच परंपरेला पुढे नेत चिपळूण येथील फलाहे दारेन एज्युकेशन सोसायटी संचलित अली पब्लिक स्कूल अँड ज्युनिअर कॉलेजचा विद्यार्थी उजेर जैनुद्दीन तांबे याने आंतरराष्ट्रीय तायक्वांदो ब्लॅक बेल्ट परीक्षेत उत्तुंग यश संपादन केले आहे. या जागतिक स्तरावरील कामगिरीमुळे उजेरने केवळ आपल्या महाविद्यालयाचेच नव्हे, तर संपूर्ण चिपळूण शहराच्या शिरपेचात मानाचा तुरा खोवला असून सर्व स्तरांतून त्याच्यावर कौतुकाचा वर्षाव होत आहे.
तायक्वांदो या मार्शल आर्ट प्रकारात ब्लॅक बेल्ट मिळवणे हे अत्यंत कठीण आणि शिस्तबद्ध सरावाचे फळ मानले जाते. आंतरराष्ट्रीय स्तरावर घेण्यात आलेल्या या खडतर परीक्षेत उजेरने आपले तंत्रशुद्ध कौशल्य आणि चपळता दाखवून यशस्वीरीत्या ब्लॅक बेल्ट प्राप्त केला. त्याच्या या यशाने चिपळूणच्या क्रीडा वैभवात मोलाची भर पडली असून ग्रामीण भागातील खेळाडू योग्य संधी मिळाल्यास जागतिक स्तरावर चमकू शकतात, हे त्याने पुन्हा एकदा सिद्ध करून दाखवले आहे.
उजेरच्या या ऐतिहासिक यशाची दखल घेत फलाहे दारेन एज्युकेशन सोसायटीच्या वतीने त्याचा विशेष गौरव करण्यात आला. संस्थेचे अध्यक्ष ज. दाऊद कुंदे, कार्याध्यक्ष ज. खालिद परकार, उप-कार्याध्यक्ष ज. नाझीम अफवारे आणि सचिव ज. हारून धामस्कर यांच्यासह सर्व पदाधिकारी व सदस्यांनी त्याचे मनःपूर्वक अभिनंदन केले. उजेरने भविष्यात अशाच प्रकारे प्रगती करून देशाचे प्रतिनिधित्व करावे आणि अधिक मोठी शिखरे सर करावीत, अशा सदिच्छा यावेळी मान्यवरांनी व्यक्त केल्या. या यशाबद्दल त्याचे प्रशिक्षक, शिक्षक आणि क्रीडाप्रेमींकडून आनंद व्यक्त केला जात आहे.
