लांजा: शहरातील गोंडेसखल रोड परिसरामध्ये अज्ञात चोरट्याने बंद घराचा कडी-कोयंडा उचकटून आत प्रवेश करत कपाटातील तब्बल ९० हजार रुपयांची रोख रक्कम चोरून नेल्याची धक्कादायक घटना घडली आहे. या संदर्भात फिर्यादी रवींद्र राजाराम पावसकर (वय ६० वर्षे, रा. घर नं. ३७५८, लांजा गोंडेसखल रोड, ता. लांजा) यांनी लांजा पोलीस ठाण्यात रीतसर तक्रार दाखल केली आहे. पोलिसांनी दिलेल्या माहितीनुसार, ही घरफोडीची घटना १६ जून २०२६ रोजी रात्री साडे नऊ वाजल्यापासून ते १७ जून २०२६ रोजी दुपारी पावणेदोन वाजेच्या दरम्यान घडली.
फिर्यादी पावसकर यांचे घर बंद असल्याचा गैरफायदा उठवत अज्ञात चोरट्याने स्वतःच्या आर्थिक फायद्यासाठी आणि लबाडीच्या इराद्याने घराच्या मुख्य दर्शनी भागाच्या दरवाजाचा कडी-कोयंडा उचकटला आणि घरात बेकायदेशीर प्रवेश केला.
घर चोरट्याने आत प्रवेश केल्यानंतर थेट बेडरूम गाठली आणि तेथे असलेल्या लाकडी कपाटाच्या उजव्या बाजूचा ड्रॉवर उघडून त्यामध्ये ठेवलेली ९० हजार रुपयांची रोख रक्कम लंपास केली.चोरी केल्यानंतर चोरटा घरातील पुढील मुख्य दरवाजा वाटेच अत्यंत शिताफीने पळून गेला. घरमालक परत आल्यानंतर हा सर्व चोरीचा प्रकार उघडकीस आला. या घटनेनंतर लांजा पोलीस ठाण्यात १७ जून २०२६ रोजी सायंकाळी ४ वाजून ११ मिनिटांनी गुन्हा रजिस्टर नंबर १२५/२०२६ नुसार नवीन भारतीय न्यायसंहिता अधिनियम २०२३ च्या कलम ३३१ (४) आणि ३०५ अन्वये अज्ञात चोरट्याविरुद्ध गुन्हा दाखल करण्यात आला आहे. लांजा पोलीस या प्रकरणाचा अधिक तपास करत असून परिसरातील संशयित आणि सीसीटीव्ही फुटेजच्या माध्यमातून अज्ञात आरोपीचा माग काढण्याचे प्रयत्न सुरू आहेत.
