रत्नागिरी: रत्नागिरी शहरानजीक एका अल्पवयीन मुलीचा सातत्याने पाठलाग करणाऱ्या तरुणाला अखेर अटक करण्यात आली आहे. मारहाणीच्या भीतीने कारमधून पळून जाण्याचा प्रयत्न करत असताना त्याने रस्त्यात काही वाहनांना धडक देत अपघात घडवला. ही घटना शुक्रवारी रात्री घडली असून, ग्रामीण पोलिसांनी त्याच्या विरोधात पोक्सो कायद्यांतर्गत गुन्हा दाखल केला आहे.
पोलिसांनी दिलेल्या माहितीनुसार, हा संशयित तरुण खेडशी परिसरातील रहिवासी आहे. तो पीडित अल्पवयीन मुलीचा सातत्याने पाठलाग करत होता. या त्रासाबाबत मुलीने आपल्या आई-वडिलांना माहिती दिली होती. दरम्यान, शुक्रवारी रात्री मुलीच्या पालकांनी या संशयिताला धडा शिकवण्याचा निर्णय घेतला. आपली मारहाण होईल हे लक्षात येताच, संशयिताने घाबरून बेदरकारपणे कार चालवत पळ काढला. या प्रयत्नात त्याने मार्गावरील काही गाड्यांना धडक दिली आणि अपघात घडवला.
यानंतर, पीडित मुलीच्या नातेवाईकांनी रत्नागिरी ग्रामीण पोलीस ठाण्यात तक्रार दाखल केली. या तक्रारीवरून ग्रामीण पोलिसांनी तातडीने कारवाई करत संशयित तरुणाला अटक केली आहे. या प्रकरणाचा अधिक तपास ग्रामीण पोलीस करत आहेत. अल्पवयीन मुलींच्या सुरक्षिततेच्या दृष्टीने हा गुन्हा गंभीर असून, पोलिसांनी तातडीने केलेल्या कारवाईचे नागरिकांकडून स्वागत होत आहे.
