तुषार पाचलकर /राजापूर
तालुक्यातील पाचल गावातील हनुमाननगर येथील हनुमान मंदिरासमोरील रस्त्यावर कल्याण मटका जुगार खेळणाऱ्या एका व्यक्तीवर छापा टाकून गुन्हा दाखल करण्यात आला आहे. ही घटना १५ जुलै २०२५ रोजी दुपारी १२:५८ वाजताच्या सुमारास घडली.
राजापूर पोलीस ठाण्याचे पोलीस शिपाई रामकृष्ण ज्ञानदेव कात्रे (वय ३४, क्रमांक १०५०) यांनी फिर्याद दिली आहे. विजय दिनकर मोहिते (वय ४२, रा. पाचल पेठवाडी, ता. राजापूर) असे आरोपीचे नाव आहे. आरोपी कल्याण मटका जुगाराचा खेळ खेळवत असताना त्याला रंगेहाथ पकडण्यात आले. त्याच्या ताब्यातून जुगाराचे साहित्य आणि ९३० रुपये रोख रक्कम असा एकूण ९३१ रुपयांचा मुद्देमाल जप्त करण्यात आला. या प्रकरणी महाराष्ट्र जुगार कायदा कलम १२(अ) नुसार गु.र.नं. १३३/२०२५ अंतर्गत गुन्हा दाखल करण्यात आला आहे. तक्रार १५ जुलै २०२५ रोजी सायंकाळी ६:२० वाजता दाखल करण्यात आली.
