खेड : लोटे औद्योगिक वसाहतीतील लासा सुपरजिनेरिक्स हा औषधनिर्मिती कारखाना गुरुवारी (दि. १७ जुलै) कोणतीही पूर्वसूचना न देता अचानक बंद करण्यात आला. कारखान्याच्या प्रवेशद्वाराला आतून कुलूप लावल्याने शेकडो कामगार कामाविना रस्त्यावर आले असून त्यांच्या कुटुंबांवर उपासमारीची वेळ आली आहे.
यापूर्वी १८ मे रोजी कारखान्यात आग लागून एक प्लांट जळून खाक झाला होता. त्यानंतर १५ जूनला काही कामगारांना कामावरून कमी केल्याची आणि पगार कपात केल्याची ईमेलद्वारे माहिती देण्यात आली होती. या पार्श्वभूमीवर कामगारांनी क्रांतिकारी कामगार संघटनेच्या माध्यमातून प्रशासनाकडे दाद मागितली होती. मात्र आता अचानक कारखाना बंद केल्याचा आरोप कामगारांनी केला आहे.
सदर निर्णयामुळे संतप्त झालेल्या कामगारांनी कारखान्याच्या गेटसमोर ठिय्या देत निदर्शने सुरू केली असून, “जोपर्यंत न्याय मिळत नाही, तोपर्यंत आंदोलन सुरूच राहील,” असा इशारा त्यांनी दिला आहे.
