गरीब विद्यार्थ्यांसाठी राज्य सरकारचा ‘सुपर 100’ उपक्रम; प्रत्येक जिल्ह्यात सुरू होणार मोफत निवासी NEET-JEE कोचिंग सेंटर

मुंबई : गरीब आणि ग्रामीण भागातील गुणवंत विद्यार्थ्यांना NEET आणि JEE सारख्या स्पर्धा परीक्षांची दर्जेदार तयारी करता यावी, यासाठी महाराष्ट्र सरकार ‘सुपर 100’ हा महत्त्वाकांक्षी उपक्रम सुरू करण्याच्या तयारीत आहे. या उपक्रमाअंतर्गत राज्यातील प्रत्येक जिल्ह्यात निवासी सरकारी कोचिंग सेंटर उभारण्यात येणार असून, निवड झालेल्या विद्यार्थ्यांना दोन वर्षांचे मोफत प्रशिक्षण, निवास, भोजन आणि अभ्यासासाठी आवश्यक साहित्य उपलब्ध करून दिले जाणार आहे.

या योजनेचा लाभ सर्व विद्यार्थ्यांना मिळणार नसून, सरकारी शाळांमधील गुणवंत आणि पात्र विद्यार्थ्यांची पारदर्शक निवड प्रक्रिया राबवून त्यांना या योजनेत प्रवेश दिला जाणार आहे. आर्थिक अडचणींमुळे गुणवंत विद्यार्थ्यांना महागडे खासगी कोचिंग किंवा शहरांमध्ये राहण्याचा खर्च परवडत नसल्याने त्यांची स्वप्ने अपूर्ण राहू नयेत, हा या योजनेचा मुख्य उद्देश आहे.

मुख्यमंत्री देवेंद्र फडणवीस आणि शालेय शिक्षण मंत्री दादा भुसे यांनी नुकत्याच झालेल्या बैठकीत या प्रस्तावाचा आढावा घेतला असून, शालेय शिक्षण विभागाने प्रस्ताव मंजुरीसाठी वित्त विभागाकडे पाठवला आहे. मंजुरी मिळाल्यानंतर प्रत्येक जिल्ह्यातील एका प्रमुख सरकारी शाळेचा निवासी कोचिंग सेंटर म्हणून विकास करण्यात येणार आहे. एका केंद्रासाठी सुमारे १.१५ कोटी रुपयांचा खर्च अपेक्षित असून, तो जिल्हा नियोजन व विकास परिषद (DPDC) निधीतून करण्यात येणार आहे.

या केंद्रांमध्ये नामांकित खाजगी कोचिंग संस्थांच्या सहकार्याने प्रशिक्षण द्यायचे की सरकारी शिक्षकांच्या माध्यमातून हा उपक्रम राबवायचा, याबाबत सरकारकडून अंतिम निर्णय घेतला जाणार आहे. मात्र, निवड झालेल्या विद्यार्थ्यांना शिक्षणासह निवास, भोजन आणि पुस्तके यांसह सर्व सुविधा पूर्णपणे मोफत उपलब्ध करून दिल्या जाणार आहेत.

‘सुपर 100’ ही योजना गणितज्ञ आनंद कुमार यांच्या प्रसिद्ध ‘सुपर 30’ उपक्रमापासून प्रेरित आहे. यापूर्वी २०२३ मध्ये आदिवासी विकास विभागाने गोंदिया जिल्ह्यात आयोजित केलेल्या विशेष प्रशिक्षण शिबिरातून २० हून अधिक विद्यार्थ्यांनी JEE Advanced परीक्षा उत्तीर्ण होत उल्लेखनीय यश मिळवले होते. त्याच धर्तीवर आता संपूर्ण महाराष्ट्रात हा उपक्रम राबविण्याची तयारी सुरू असल्याची माहिती समोर आली आहे.