एस.टी चालक श्री. किशोर जाधव सेवानिवृत्त; खंडाळा कंट्रोल पॉईंट येथे सत्कार!

खंडाळा: महाराष्ट्र राज्य मार्ग परिवहन महामंडळात (एस.टी.) अत्यंत प्रामाणिकपणे आणि निष्ठापूर्वक सेवा बजावून, आपले कर्तव्य पार पाडत खंडाळा वाटद गावचे सुपुत्र श्री. किशोर पांडुरंग जाधव हे ३१ जुलै २०२६ रोजी सेवानिवृत्त झाले आहेत. त्यांच्या या यशस्वी आणि दीर्घ सेवापूर्तीनिमित्त नुकताच खंडाळा कंट्रोल पॉईंट येथे सत्कार सोहळ्याचे आयोजन करण्यात आले होते.

श्री. किशोर पांडुरंग जाधव हे सन २००० मध्ये खेड डेपोमध्ये चालक पदी एसटी महामंडळात रुजू झाले होते. त्यानंतर तीन वर्षांनी त्यांची बदली रत्नागिरी डेपोमध्ये झाली. आपल्या संपूर्ण २६ वर्षे ३ महिन्यांच्या सेवाकाळात त्यांनी आपली कामगिरी अत्यंत उत्कृष्ट आणि जबाबदारीने पार पाडली. प्रवाशांच्या सुरक्षेला प्राधान्य देत त्यांनी आपली नोकरी पूर्ण निष्ठावानपणे पार पाडली.

खंडाळा कंट्रोल पॉईंट येथे झालेल्या या सत्कार समारंभास एसटी महामंडळाचे अधिकारी, कर्मचारी तसेच परिसरातील अनेक प्रतिष्ठित मान्यवर आवर्जून उपस्थित होते. यावेळी श्री. किशोर जाधव यांचा शाल व श्रीफळ देऊन गौरव करण्यात आला.

या कार्यक्रमास खंडाळा वाहतूक नियंत्रक संतोष कांबळे, निवृत्त वाहतूक नियंत्रक आर. डी. चव्हाण, निवृत्त वाहक खानविलकर, सामाजिक कार्यकर्ते तथा पेपर दुकान मालक आदरणीय श्री. शेखर भडसावळे, संदेश उर्फ बाबू पाटील, सामाजिक कार्यकर्ते श्री. चंद्रकांत पवार, सोनू जाधव काका, गोड स्वादिष्ट चहा वाले सुदेश, तसेच वाहक डी. आर. कांबळे आणि चालक सुर्या उपस्थित होते.

कार्यक्रमाच्या शेवटी उपस्थित सर्व मान्यवरांनी आणि सहकाऱ्यांनी श्री. किशोर जाधव यांना पुढील आयुष्यात उदंड आयुष्य आणि उत्तम आरोग्य लाभो, अशा मनःपूर्वक सदिच्छा व्यक्त केल्या. एका कर्तव्यकठोर कर्मचाऱ्याच्या निवृत्तीबद्दल खंडाळा परिसरातून त्यांच्यावर अभिनंदनाचा वर्षाव होत आहे.