वयाची खात्री करण्यासाठी नवा पर्याय
मुंबई: टेक क्षेत्रातील दिग्गज कंपनी मेटा आपल्या लोकप्रिय इन्स्टंट मेसेजिंग ॲप व्हॉट्सॲपसाठी भारतात नवीन फीचरची चाचणी करत आहे.या फीचरच्या माध्यमातून यूजर्सना व्हॉट्सॲपवर आपली जन्मतारीख नोंदवता येणार आहे. भारतात लागू होऊ घातलेल्या डिजिटल नियमांचे पालन करण्यासाठी कंपनीकडून वयाची खात्री करण्याच्या विविध पद्धतींची चाचणी केली जात असल्याचे व्हॉट्सॲपने स्पष्ट केले आहे.
अलीकडे काही यूजर्सच्या व्हॉट्सॲपवर दिसलेल्या स्क्रीनशॉटमध्ये ‘तुमची जन्मतारीख जोडा. भारतात येणाऱ्या कायद्यांनुसार आम्हाला तुमचे वय विचारावे लागेल,’ असा संदेश दिसत आहे. व्हॉट्सॲपच्या प्रवक्त्याने सांगितले की, डिजिटल पर्सनल डेटा प्रोटेक्शन ॲक्टसारख्या आगामी कायद्यांचे पालन करण्यासाठी वयाची खात्री करण्याच्या अशा पद्धती तपासल्या जात आहेत, ज्यामध्ये यूजर्सच्या गोपनीयतेचे संरक्षण केले जाईल.
भारतामध्ये मुलांच्या वैयक्तिक डेटाच्या प्रक्रियेशी संबंधित नियमांनुसार, एखादा यूजर १८ वर्षांपेक्षा कमी वयाचा आहे की नाही, हे निश्चित करण्यासाठी वय पडताळणीची आवश्यकता निर्माण होऊ शकते. भारत हा व्हॉट्सॲपचा सर्वात मोठा बाजार असून देशात ६० कोटींपेक्षा अधिक सक्रिय यूजर्स असल्याचे सांगितले जाते.
दरम्यान, जगभरातील अनेक सरकारे अल्पवयीन मुलांच्या सोशल मीडिया वापराबाबत कठोर नियम लागू करण्याच्या तयारीत आहेत. मात्र, ऑस्ट्रेलियातील काही नियमांमध्ये व्हॉट्सॲपचा समावेश करण्यात आलेला नाही.
व्हॉट्सॲपने स्पष्ट केले आहे की, वयाची खात्री करण्यासाठी सुरू असलेली ही चाचणी ऐच्छिक आहे. सध्या ॲपचा वापर सुरू ठेवण्यासाठी यूजर्सना आपले वय अनिवार्यपणे कन्फर्म करावे लागणार नाही. तसेच जन्मतारीख किंवा वयाची माहिती इतर व्हॉट्सॲप यूजर्ससोबत शेअर केली जाणार नसून, यामुळे ॲपच्या वापराच्या पद्धतीत किंवा यूजरच्या अनुभवात कोणताही बदल होणार नसल्याचे कंपनीने म्हटले आहे.
